ପୂର୍ବତନ କଂଗ୍ରେସ ସାଂସଦ ଜ୍ୟୋତି ମିର୍ଦ୍ଧା ବିଜେପିରେ ସାମିଲ

ଜୟପୁର: ନିର୍ବାଚନ ଯେତେ ପାଖେଇ ଆସୁଛି, ରାଜସ୍ଥାନ ରାଜନୀତି ସେତେ ସରଗରମ ହେଉଛି। ନିଜ ସ୍ବାର୍ଥକୁ ଦୃଷ୍ଟିରେ ରଖି ନେତାମାନଙ୍କ ଦଳ ବଦଳ ପ୍ରକ୍ରିୟା ମଧ୍ୟ ଆରମ୍ଭ ହୋଇଯାଇଛି। ସୋମବାର ଏହିଭଳି ଏକ ଖବରକୁ ନେଇ ଚର୍ଚ୍ଚା ଜୋର ଧରିଛି। ନାଗୌରର ପୂର୍ବତନ ସାଂସଦ ତଥା ବରିଷ୍ଠ କଂଗ୍ରେସ ନେତା ସ୍ବର୍ଗତ ନାଥୁରାମ ମିର୍ଦ୍ଧାଙ୍କ ନାତୁଣୀ ଜ୍ୟୋତି ମିର୍ଦ୍ଧା ବିଜେପିରେ ସାମିଲ ହୋଇଛନ୍ତି। ତାଙ୍କ ସହ ସୱାଇ ସିଂହ ମଧ୍ୟ ବିଜେପିରେ ଯୋଗ ଦେଇଛନ୍ତି। ରାଜସ୍ଥାନ ବିଜେପି ସଭାପତି ସିପି ଯୋଶୀ ଜ୍ୟୋତି ମିର୍ଦ୍ଧାଙ୍କୁ ସଦସ୍ୟତା ପ୍ରଦାନ କରି ଦଳକୁ ସ୍ୱାଗତ କରିଛନ୍ତି।

ମିଳିଥିବା ସୂଚନା ମୁତାବକ, ବିଜେପିର ଏହି ପଦକ୍ଷେପ ବିରୋଧୀ କଂଗ୍ରେସକୁ ଶକ୍ତ ଝଟ୍‌କା ଦେଇଛି। ମିର୍ଦ୍ଧା ବିଜେପିକୁ ଆସିବା ଦ୍ବାରା ବିଜେପି ମଜଭୂତ ହୋଇଛି କିନ୍ତୁ କଂଗ୍ରେସର ଚିନ୍ତା ବଢିଯାଇଛି। ଜ୍ୟୋତି ମିର୍ଦ୍ଧାଙ୍କର ଜାଟ୍‌ ସମ୍ପ୍ରଦାୟରେ ଦବଦବା ରହିଛି। ଏଭଳି ପରିସ୍ଥିତିରେ କଂଗ୍ରେସ ପାଇଁ ଏହ ଭଲ ଖବର ନୁହେଁ।

ଜ୍ୟୋତି ନାଗୌରରୁ କଂଗ୍ରେସ ସାଂସଦ ଥିଲେ। ରାଜସ୍ଥାନ ରାଜନୀତିରେ ଜ୍ୟୋତି ମିର୍ଦ୍ଧା ଏକ ବଡ଼ ନାମ। ରାଜ୍ୟର ଜାଟ ସମ୍ପ୍ରଦାୟରେ ମିର୍ଦ୍ଧା ପରିବାରର ଭଲ ପ୍ରଭାବ ରହିଛି। ୨୦୧୯ରେ ନାଗୌର ଲୋକସଭା ଆସନରୁ କଂଗ୍ରେସ ଜ୍ୟୋତି ମିର୍ଦ୍ଧାଙ୍କୁ ରାଜନୀତି ମୈଦାନକୁ ପଠାଇଥିଲା। ୨୦୦୯ରେ ନାଗୌର ସାଂସଦ ଥିବା ଜ୍ୟୋତି ମିର୍ଦ୍ଧାଙ୍କୁ ୨୦୧୪ରେ ବିଜେପିର ସିଆର ଚୌଧୁରୀ ଏବଂ ୨୦୧୯ରେ ଏନଡିଏ ମେଣ୍ଟର ଆରଏଲପି ପ୍ରାର୍ଥୀ ହନୁମାନ ବେନିୱାଲ ପରାସ୍ତ କରିଥିଲେ।