ନୂଆଦିଲ୍ଲୀ : ବିଶିଷ୍ଟ ସ୍ବାସ୍ଥ୍ୟ ପରାମର୍ଶଦାତା(ଫିଟନେସ୍ ଆଇକନ୍) ଅନିଲ କଦସୁରଙ୍କ ହୃଦଘାତରେ ପରଲୋକ ହୋଇଛି । ସାଇକେଲ ଚାଳନା କ୍ଷେତ୍ରରେ ବେଙ୍ଗାଲୁରୁର ଅନିଲ କଦସୁରଙ୍କ ଉଲ୍ଲେଖନୀୟ ଅବଦାନ ରହିଛି । ୪୫ ବର୍ଷୀୟ କଦସୁର ଲଗାତର ୪୨ ମାସ ଧରି୧୦୦ କିଲୋମିଟର ସାଇକେଲ ଚଲାଇ ରେକର୍ଡ କରିଥିଲେ । ତାଙ୍କର ଏହି ଉପଲବ୍ଧି ପରେ ସାଇକିଲିଂ ସମୁଦାୟ ଏତେ ପ୍ରେରିତ ହୋଇଥିଲେ କି ଅନେକ ସାଇକିଲିଷ୍ଟ ତାଙ୍କ ସହିତ ଦେଖା ହେବା ପାଇଁ ଲାଇନ୍ ଲଗାନ୍ତି ।
୩୧ ଜାନୁୟାରୀରେ ସୋସିଆଲ ମିଡିଆରେ ଅନିଲ କଦସୁର ଖୁସି ହୋଇ ଜଣାଇଥିଲେ କି ସେ ଲଗାତର ୪୨ ମାସ ଧରି ପ୍ରତିଦିନ ୧୦୦ କିଲୋମିଟର ସାଇକେଲ ଯାତ୍ରା ଲକ୍ଷ୍ୟକୁ ପୂରଣ କରିଛନ୍ତି । କିନ୍ତୁ ସେହି ରାତିରେ ଅଚାନକ ତାଙ୍କ ସ୍ବାସ୍ଥ୍ୟ ଖରାପ ହେବାରୁ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା । ତେବେ ଦୁର୍ଭାଗ୍ୟବଶତଃ ପରଦିନ ସକାଳେ ତାଙ୍କର ମୃତ୍ୟୁ ହୋଇଛି ।
ସାଇକେଲ ଚାଳନାରେ ୧୦ ବର୍ଷରୁ ଅଧିକ ବର୍ଷର ଅଭିଜ୍ଞତା ରଖିଥିବା କଦସୁର ସାଇକେଲରେ ୨.୨୫ ଲକ୍ଷ କିଲୋମିଟରରୁ ମଧ୍ୟ ଅଧିକ ଯାତ୍ରା କରିଛନ୍ତି । ସେ ନୂଆ ସାଇକେଲ ଚଳାଳୀଙ୍କୁ ସବୁବେଳେ ପରାମର୍ଶ ଦିଅନ୍ତି ଏବଂ ସେମାନଙ୍କ ଉତ୍ସାହ ବଢାନ୍ତି । ତାଙ୍କ ପାଖରେ ୬ ଫିକ୍ସି ସାଇକେଲ ଥିଲା । ସେ ଏହାକୁ ପାଳି ପାଳି କରି ଚଲାଉଥିଲେ । ସେ ନିଜ ଯାତ୍ରା ଜରିଆରେ ଫିକ୍ସି(ଫିକ୍ସଡ-ଗିୟର ସାଇକେଲ)କୁ ଘରେ ଘରେ ପରିଚିତ କରିଦେଇଥିଲେ । ତାଙ୍କ ପରଲୋକ ପରେ ସାଇକେଲ ଚଳାଳୀ ଏବଂ ଏଥିପ୍ରତି ଆଗ୍ରହ ରଖୁଥିବା ଲୋକଙ୍କ ମଧ୍ୟରେ ଶୋକର ଛାୟା ଖେଳିଯାଇଛି ।
