ଆମେରିକାର ଦୁଇ ଧନୀଙ୍କ ମଧ୍ୟରେ ଛକାପଞ୍ଛା

ସମାଜ ଡିଜିଟାଲ ଡେସ୍କ: ଆମେରିକାର ଦୁଇ ଧନୀଙ୍କ ମଧ୍ୟରେ ଜାରି ରହିଛି ଛକାପଞ୍ଛା। ସେମାନଙ୍କ କଳି ଏବେ ହାଟରେ ପଡ଼ି ଦାଣ୍ଡରେ ଗଡ଼ୁଛି। ଏହି ଦୁଇ ଧନୀ ହେଉଛନ୍ତି ଟେସଲା ମାଲିକ ଏଲନ ମସ୍କ ଏବଂ ଜର୍ଜ ସୋରୋସ। ୱିସକନସିନ ଟାଉନ ହଲ ଭାଷଣ ସମୟରେ ଜଣେ ବିକ୍ଷୋଭକାରୀ ମସ୍କଙ୍କୁ ଭାଷଣ ଦେବାରୁ ରୋକିବାକୁ ଉଦ୍ୟମ କରିଥିଲେ। ଏହା ପରେ ମସ୍କ କହିଥିଲେ ବିକ୍ଷୋଭକାରୀଙ୍କୁ ତାଙ୍କ ପ୍ରତିଦ୍ବନ୍ଦ୍ବୀ ପଠାଇଛନ୍ତି। ସେ ହସି ହସି କହିଥିଲେ ମୋ ତରଫରୁ ଜର୍ଜଙ୍କୁ ହାଏ କହିବ। ଏହା ଶୁଣି ସେଠାରେ ଉପସ୍ଥିତ ଲୋକେ ଆମେରିକା ଆମେରିକା ନାରା ଲଗାଇଥିଲେ।

ମସ୍କ କହିଥିଲେ, ଏପରି ଘଟିବା ଅନିବାର୍ଯ୍ୟ ଥିଲା। ଦର୍ଶକମାନଙ୍କ ମଧ୍ୟରେ କିଛି ସୋରୋସଙ୍କ ସମର୍ଥକ ରହିଛନ୍ତି। ଜର୍ଜଙ୍କୁ ମୋର ଅଭିଭାଦନ ଜଣାଇବେ। ଚଳିତ ମାସର ଆରମ୍ଭରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବି ଦୁଇ ଧନୀଙ୍କ ମଧ୍ୟରେ ଚାଲିଥିବା ଯୁଦ୍ଧ ବିଷୟରେ ମୁହଁ ଖୋଲିଥିଲେ। ଟେସଲା ଏବଂ ଏହାର ଶୋ’ରୁମରେ ବଢ଼ୁଥିବା ଆକ୍ରମଣ ପଛରେ ଜର୍ଜ ସୋରୋସଙ୍କ ହାତ ରହିଛି। ମସ୍କ ଟ୍ରମ୍ପଙ୍କ ମୁଖ୍ୟ ଟିମରେ ସାମିଲ ହେବା ପରଠାରୁ ତାଙ୍କ ଉପରେ ବାରମ୍ବାର ଆକ୍ରମଣ ଉଦ୍ୟମ ହୋଇଛି। ଏହା ପଛରେ ସୋରୋସଙ୍କ ହାତ ରହିଥିବା ମସ୍କ କହିଆସୁଛନ୍ତି।

ଜୋ ବାଇଡେନ ରାଷ୍ଟ୍ରପତି ଥିବା ସମୟରେ ଜର୍ଜ ସୋରୋସଙ୍କୁ ଆମେରିକାର ସର୍ବୋଚ୍ଚ ନାଗରିକ ସମ୍ମାନ ‘ପ୍ରେସିଡେନସିଆଲ ମେଡାଲ ଅଫ ଫ୍ରୀଡମ’ରେ ସମ୍ମାନିତ କରାଯାଇଥିଲା। ମସ୍କ ଏହାକୁ ଅନ୍ୟାୟ ବୋଲି କହିଥିଲେ। ସୋରୋସ ମାନବତାକୁ ଘୃଣା କରୁଥିବା ବ୍ୟକ୍ତି ବୋଲି ମସ୍କ କହିଥିଲେ।