ଫୁଲବାଣୀ : ଗତ କିଛି ଦିନ ହେବ ଫିରିଙ୍ଗିଆ ବ୍ଲକରେ ଲଗାଣ ବର୍ଷା ଲାଗି ରହିଛି। ଯାହାଦ୍ୱାରା ଫିରିଙ୍ଗିଆ ବ୍ଲକର ବହୁ ଗାଁ ମାନଙ୍କରେ ଘର ଭାଙ୍ଗିବା ସହ ରାସ୍ତାଘାଟ ଯୋଗାଯୋଗ ବିଚ୍ଛିନ୍ନ ହୋଇ ପଡିଛି। ଏମିତି କି ଗଛ ପଡିବା ଦ୍ୱାରା ରାସ୍ତା ଅବରୋଧ ମଧ୍ୟ ହୋଇଥିବା ବେଳେ ଦମକଳ ବାହିନୀ ସହାୟତାରେ ଗଛ କାଟି ରାସ୍ତା ସଫା କରାଯାଇଥିବା ଦେଖିବାକୁ ମିଳିଛି । ପୁଣି ଗତ କାଲି ସକାଳ ୯ଟାରେ ପକାରୀ ପଞ୍ଚାୟତର ପକାରୀ ଗାଁରେ ଗୋଟିଏ ଘର ଭାଙ୍ଗିଥିବା ବେଳେ, ମାଲା ଗାଁ, କେଳାପଡ଼ା ଭଳି ଅନେକ ଗାଁରେ ଘର ଭାଙ୍ଗିଥିବା ଦେଖିବାକୁ ମିଳିଛି।
କାଲି ସୁଦ୍ଧା ଲଘୁଚାପ କ୍ଷେତ୍ର! ୨୪ ଘଣ୍ଟାରେ ପ୍ରବଳ ବର୍ଷା ସମ୍ଭାବନା..
ଘର ଭାଙ୍ଗିବା ଦ୍ୱାରା ଲୋକେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଏମିତି କି କିଛି ଲୋକଙ୍କ ଘର ଭାଙ୍ଗିବା ଦ୍ୱାରା ବିଭିନ୍ନ ଆସବାବ ପତ୍ର ଓ ଆବଶ୍ୟକୀୟ କାଗଜ ପତ୍ର ଭଳି ଗୁରତ୍ୱପୂର୍ଣ୍ଣ ଜିନିଷ ମଧ୍ୟ ନଷ୍ଟ ହୋଇଥିବା ସୂଚନା ମିଳିଛି। ଏହି ଘଟଣାକୁ ନେଇ ଫିରିଙ୍ଗିଆ ତହସିଲଦାର ଅନାମିକା ପାଣ୍ଡେଙ୍କୁ ପଚାରିବାରୁ ଫିରିଙ୍ଗିଆ ବ୍ଲକରେ ୧୫ ଜଣକ ଘର ଭାଙ୍ଗିଥିବା ଖବର ମିଳିବା ପରେ ତାଙ୍କୁ ଜରି ପାଲ ଦିଆଯାଇଛି। ଅଧିକ କ୍ଷୟକ୍ଷତି ହୋଇଥିବା ଦୁଇଟି ଘରକୁ ସରକାରଙ୍କ ତରଫରୁ ୧ଲକ୍ଷ କୋଡିଏ ହଜାର ଟଙ୍କା ଆର୍ଥିକ ସହାୟତା ପ୍ରଦାନ କରାଯିବ ବୋଲି କହିଛନ୍ତି। ଏହା ବ୍ୟତୀତ ଯଦି ଘର ଭାଙ୍ଗିଥିବା ଖବର ଆସେ ତାଙ୍କୁ ମଧ୍ୟ ଯାହା ବ୍ୟବସ୍ଥା ଅଛି ସହଯୋଗ କରାଯିବ ବୋଲି କହିଛନ୍ତି। ତେବେ ବ୍ଲକର ବିଭିନ୍ନ ଗାଁରେ ଭାଙ୍ଗିଥିବା ଘର ସଂଖ୍ୟା ଅଧିକ ହେବ ବୋଲି ସୂଚନା ମିଳିଛି।
