ଡେସ୍କ: ଆଜି ବୁଧବାର କାର୍ତ୍ତିକ ମାସ ଶୁକ୍ଲପକ୍ଷ ନବମୀ ତିଥି ପବିତ୍ର ଅଁଳା ନବମୀ, ଶ୍ରୀରାଧା ପାଦ ଦର୍ଶନ ଓ ଜଗଦ୍ଧାତ୍ରୀ ପୂଜା। ଓଡିଶାର ଦ୍ୱିତୀୟ ବୃହତ ଗଣପର୍ବ ଭାବେ ପରିଚିତ ଅଁଳା ନବମୀରେ ଶ୍ରୀରାଧାଙ୍କ ପାଦଦର୍ଶନ କରିବାକୁ ରାଜ୍ୟ ତଥା ରାଜ୍ୟ ବାହାରୁ ସାକ୍ଷୀଗୋପାଳକୁ ଭକ୍ତଙ୍କ ସମାଗମ ହୋଇଥାଏ। ସାକ୍ଷୀଗୋପାଳର ଏହି ଯାତ୍ରା ପୁରୀ ରଥଯାତ୍ରା ପରେ ଦ୍ୱିତୀୟ ବଡ଼ ଯାତ୍ରା ଭାବେ ପରିଚିତ। ଏହିଦିନ ଶ୍ରଦ୍ଧାଳୁମାନେ ମଧ୍ୟ ଅଁଳା ଗଛକୁ ପୂଜା କରିଥାନ୍ତି।
ଠାକୁର ସାକ୍ଷୀଗୋପାଳ ଉତ୍ତର ଭାରତରୁ ଆସିଥିବାରୁ ଉତ୍ତର ଭାରତୀୟ ରୀତିନୀତି ଅନୁଯାଇ ଠାକୁରଙ୍କର ଦେବନୀତି ଅନୁଷ୍ଠିତ ହୋଇଥାଏ। ସେହିପରି ଠାକୁରାଣୀ ଶ୍ରୀ ଶ୍ରୀ ରାଧାରାଣୀ ଉତ୍ତର ଭାରତୀୟ ବେଶଭୂଷା ପରିଧାନ କରିଥାନ୍ତି। ବର୍ଷସାରା ଠାକୁରାଣୀଙ୍କର ପାଦପଦ୍ମ ପିନ୍ଧା ବସ୍ତ୍ର ଦ୍ୱାରା ଆବୃତ୍ତ ହୋଇ ରହିଥାଏ। କେବଳ ବର୍ଷକରେ ଏହି ଗୋଟିଏ ଦିନ ଠାକୁରାଣୀ ଓଡ଼ିଆଣୀ ବେଶ ହୋଇ କାଣିଆ କଛା ମାରିଥାନ୍ତି। ତେଣୁ ଠାକୁରାଣୀଙ୍କ ପିନ୍ଧା ବସନ ପାଦପଦ୍ମ ଉପରକୁ ଉଠି ରହିଥାଏ ଓ ଭକ୍ତମାନଙ୍କୁ ଠାକୁରାଣୀଙ୍କ ପାଦ ଦର୍ଶନର ଦୁର୍ଲ୍ଲଭ ସୁଯୋଗ ମିଳେ। ସେହିପରି ଠାକୁର ଶ୍ରୀଶ୍ରୀ ଗୋପାଳ ଜୀଉଙ୍କୁ ମଧ୍ୟ ମନୋରମ ନଟବର ବେଶରେ ସୁସଜ୍ଜିତ କରାଯାଏ।
