ଡେସ୍କ: ଫାଇନାନ୍ସିଆଲ ଆକ୍ସନ ଟାସ୍କ ଫୋର୍ସ (ଏଫଏଟିଏଫ) ବେଆଇନ ଅର୍ଥ କାରବାର ଏବଂ ଆତଙ୍କବାଦୀ ପାଣ୍ଠି ଯୋଗାଣ ସହିତ ଜଡିତ ବିପଦକୁ ହ୍ରାସ କରିବା, ନଗଦ ଭିତ୍ତିକ ଅର୍ଥନୀତିରୁ ଡିଜିଟାଲ ଅର୍ଥନୀତିକୁ ଯିବା ଏବଂ ଜନଧନ ଆଧାର ପ୍ରଚଳନ ସହିତ ଜଡିତ ବିପଦକୁ ହ୍ରାସ କରିବା ପାଇଁ ଭାରତର ପ୍ରୟାସକୁ ପ୍ରଶଂସା କରିଛି। ଏଫଏଟିଏଫ ଭାରତର ମ୍ୟୁଚୁଆଲ ଆସେସମେଣ୍ଟ ରିପୋର୍ଟରେ ଦେଶକୁ ନିୟମିତ ନିରନ୍ତରତା ଶ୍ରେଣୀରେ ରଖିଛି। ଜୁନ୍ ୨୬ରୁ ୨୮ ତାରିଖ ପର୍ଯ୍ୟନ୍ତ ସିଙ୍ଗାପୁରରେ ଅନୁଷ୍ଠିତ ଟାସ୍କଫୋର୍ସର ପୂର୍ଣ୍ଣାଙ୍ଗ ଅଧିବେଶନରେ ଏହି ରିପୋର୍ଟ ଗୃହୀତ ହୋଇଥିଲା।
ଅର୍ଥ ମନ୍ତ୍ରଣାଳୟ କହିଛି ଯେ, ଭାରତ ବ୍ୟତୀତ ଅନ୍ୟ ୪ଟି ଜି-୨୦ ଦେଶକୁ ଏହି ସ୍ୱତନ୍ତ୍ର ବର୍ଗରେ ରଖାଯାଇଛି। ମନ୍ତ୍ରଣାଳୟ କହିଛି ଯେ ଏଫଏଟିଏଫ ରିପୋର୍ଟ ଭାରତରେ ଆର୍ଥିକ ବ୍ୟବସ୍ଥାର ସାମଗ୍ରିକ ସ୍ଥିରତା ଓ ଅଖଣ୍ଡତାକୁ ପ୍ରତିଫଳିତ କରେ ଏବଂ ଅର୍ଥନୀତିକୁ ଉପକୃତ କରିବ। ଏକ ଭଲ ରେଟିଂ ବିଶ୍ୱ ଆର୍ଥିକ ବଜାରରେ ଉନ୍ନତ ପ୍ରବେଶ ପ୍ରଦାନ କରିବ ଏବଂ ନିବେଶକଙ୍କ ଆତ୍ମବିଶ୍ୱାସକୁ ବଢ଼ାଇବ। ଏହା ୟୁପିଆଇର ବିଶ୍ୱବ୍ୟାପୀ ସମ୍ପ୍ରସାରଣରେ ମଧ୍ୟ ସହାୟକ ହେବ। ଏହି ଗୁରୁତ୍ୱପୂର୍ଣ୍ଣ ଉପଲବ୍ଧି ଅନ୍ତର୍ଜାତୀୟ ମାନଦଣ୍ଡ ପ୍ରତି ଭାରତର ପ୍ରତିବଦ୍ଧତା ଏବଂ ଆର୍ଥିକ ଅପରାଧ ବିରୋଧରେ ବିଶ୍ୱସ୍ତରୀୟ ଲଢ଼େଇରେ ସକ୍ରିୟ ଅଂଶଗ୍ରହଣର ପ୍ରଦର୍ଶନ ବୋଲି ମନ୍ତ୍ରଣାଳୟ କହିଛି।
ଫାଇନାନ୍ସିଆଲ ଆକ୍ସନ ଟାସ୍କ ଫୋର୍ସ ହେଉଛି ଏକ ଆନ୍ତଃସରକାରୀ ସଂସ୍ଥା। ୧୯୮୯ ମସିହାରେ ସ୍ଥାପିତ ହୋଇଥିବା ଏହି ସଂଗଠନ କଳାଧନ, ଆତଙ୍କବାଦୀ କାର୍ଯ୍ୟକଳାପକୁ ଅର୍ଥ ଯୋଗାଣ ଏବଂ ଅନ୍ତର୍ଜାତୀୟ ଆର୍ଥିକ ବ୍ୟବସ୍ଥା ପ୍ରତି ଥିବା ଅନ୍ୟ ବିପଦର ମୁକାବିଲା ପାଇଁ ପ୍ରୟାସ ଉପରେ ଗୁରୁତ୍ୱ ଦେଉଛି।
Comments are closed.