କେଶଦୁରାପାଳ: ଦେଓଗାଁ ସମବାୟ ସିମିତିରେ ଚାଷୀ ମାରଣ ନୀତି ଅବଲମ୍ବନ କରାଯାଉଥିବା ଅଭିଯୋଗ ହୋଇଛି। ଏହା ପ୍ରତିବାଦରେ ସୋମବାର ନୂଆପଡ଼ାର ଶତାଧିକ ଚାଷୀ ଆନନ୍ଦପୁର ଉପଜିଲାପାଳଙ୍କ ବାସଭବନ ଘେରାଉ କରିଛନ୍ତି।
ସୂଚନା ଅନୁସାରେ, ଘସିପୁରା ବ୍ଲକ ଅନ୍ତର୍ଗତ ନୂଆପଡ଼ା ଗ୍ରାମବାସୀ ଧାନ ବିକ୍ରି ପାଇଁ ଦେଓଗାଁ ସମବାୟ ସିମିତି ଅଧୀନରେ ଜମି ପଞ୍ଜୀକରଣ କରିଛନ୍ତି। ଗତ ଡିସେମ୍ବର ୨୮ରୁ ସେମାନଙ୍କ ମୋବାଇଲକୁ ମେସେଜ ଆସିଛି। କିନ୍ତୁ ଦେଓଗାଁ ସମବାୟ ସିମିତିର ଟାର୍ଗେଟ ୧୨୦୦୦ କୁଇଣ୍ଟ।ଲ ଥିବାବେଳେ ଏହି ଟାର୍ଗେଟ ପୂରଣ ହୋଇଯାଇଛି। ମେସେଜ ପାଇବାର ୨୦ ଦିନ ବିତିଯାଇଥିଲେ ମଧ୍ୟ ଆଜି ଯାଏ ନୂଆପଡ଼ା ଚାଷୀମାନେ ଟୋକନ ପାଇ ନ ଥିବା ଅଭିଯୋଗ କରିଛନ୍ତି।
ସେହିପରି ମଣ୍ଡିରେ ଧାନ କୁଇଣ୍ଟାଲ ପ୍ରତି ୫ରୁ ୭ କି.ଗ୍ରା. କଟାଯାଉଥିବାରୁ ଏହାକୁ ଚାଷୀମାନେ ବିରୋଧ କରିବା ସହିତ କଟନୀଛଟନୀ ବନ୍ଦ କରିବାକୁ ଦାବି କରିଛନ୍ତି। କେନ୍ଦୁଝର ଜିଲା ପ୍ରଶାସନର ନିଷ୍କ୍ରିୟତା ଓ ଦୁର୍ନୀତିଖୋର ମନୋଭାବ କାରଣରୁ ଚାଷୀ ବାଧ୍ୟହୋଇ ଦଲାଲଙ୍କୁ ୧୨୦୦ରୁ ୧୩୦୦ ଟଙ୍କାରେ ଧାନ ବିକୁଛନ୍ତି ବୋଲି ଚାଷୀମାନେ ଅଭିଯୋଗ କରିଛନ୍ତି।
ଏହି ସମସ୍ୟାର ସମାଧାନ ଦାବିରେ ଚାଷୀମାନେ ଆଜି ଉପଜିଲାପାଳଙ୍କ ବାସଭବନ ଘେରାଉ କରିବା ସହିତ ନୂଆପଡ଼ାର ଚାଷୀମାନଙ୍କ ପାଇଁ ଟୋକନ ବ୍ୟବସ୍ଥା କରିବା ଲାଗି ଆନନ୍ଦପୁର ଉପଜିଲାପାଳଙ୍କୁ ଲିଖିତ ଭାବେ ଜଣାଇଛନ୍ତି। କୃଷ୍ଣଚନ୍ଦ୍ର ରାଉତ, ସତ୍ୟାନନ୍ଦ ଜେନା, ରଞ୍ଜନ କୁମାର ରାଉତ, କୋଦଣ୍ଡ ଧର ସ୍ଵାଇଁ, ଗୋଲକ ବିହାରୀ ଜେନା, ଅକ୍ଷୟ କୁମାର ମଲ୍ଲିକ, ବିଚିତ୍ର କୁମାର ରାଉତ, ବଳରାମ ରାଉତ, ପ୍ରକାଶ କୁମାର ରାଉତ ପ୍ରମୁଖ ବହୁ ଚାଷୀ ଏଥିରେ ସାମିଲ ହୋଇଥିଲେ।
