ସମ୍ବଲପୁର : ସମ୍ବଲପୁରର ମାନେଶ୍ୱର ବ୍ଲକ ଅର୍ନ୍ତଗତ ସାହାସପୁର ଗ୍ରାମ ପଞ୍ଚାୟତ ଅଧିନସ୍ଥ ସଙ୍ଖଲା ଗ୍ରାମରେ ବିନା କୌଣସି ସୂଚନାରେ ଚାଷୀଙ୍କ ବିଦ୍ୟୁତ ସଂଯୋଗ ବିଚ୍ଛିନ୍ନ କରାଯିବା ଜିଲାପାଳଙ୍କ ନିକଟରେ ଅଭିଯୋଗ କରାଯାଇଛି । ଗୁରୁବାର ସଙ୍ଖଲା ଗ୍ରାମ ନିବାସୀ ଚାଷୀ ପ୍ରଫୁଲ୍ଲ କୁମାର ପଣ୍ଡା ଦେଇଥିବା ଅଭିଯୋଗ ପତ୍ର ଅନୁଯାୟୀ, ତାଙ୍କର ୧.୫ ଏକର ଚାଷ ଜମିରେ ଖରିଫ ଋତୁର ଧାନ ଚାଷ କରିଛନ୍ତି। ଏହି ଜମିରେ ଚାଷ କାର୍ଯ୍ୟ କରିବା ପାଇଁ ଏକ ଉଠା ଜଳସେଚନ ପ୍ରକଳ୍ପ ରହିଛି । ଆବଶ୍ୟକ ସମୟରେ ସେହି ଜମିକୁ ଉଠା ଜଳସେଚନ ମାଧ୍ୟମରେ ପାଣି ମଡାଯାଇ ଚାଷ କାର୍ଯ୍ୟ କରାଯାଇଥାଏ। ଏବେ ଚାଷ କାର୍ଯ୍ୟ ପାଇଁ ଜଳର ଆବଶ୍ୟକତା ଥିବାରୁ ଉଠା ଜଳସେଚନ ପଏଣ୍ଟ ମାଧ୍ୟମରେ ପାଣି ଚାଷ ଜମିକୁ ମଡାଯାଉଥିବା ବେଳେ ବିଦ୍ୟୁତ ସରବରାହକୁ ବିଚ୍ଛିନ୍ନ କରାଯାଇଥିବାରୁ ଚାଷ କାର୍ଯ୍ୟ ବାଧାପ୍ରାପ୍ତ ହୋଇଛି। ଏଣୁ ଏ ସମ୍ପର୍କରେ ଟାଟା ପାୱାରକୁ ଅନଲାଇନ୍ ମାଧ୍ୟମରେ ଅଭିଯୋଗ କରାଯାଇଥିଲା । କିନ୍ତୁ ବିଭାଗୀୟ କର୍ମଚାରୀ ମାନେ ଖାମଖିଆଲି ମନୋଭାବ ଯୋଗୁଁ ଅଭିଯୋଗକୁ ଧ୍ୟାନରେ ନେଉ ନାହାନ୍ତି । ବାରମ୍ବାର ଅନୁରୋଧ ସତ୍ୱେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରା ନ ଯିବାରୁ ଚାଷୀ ଶ୍ରୀ ପଣ୍ଡା ପଚରାଉଚୁରା କରିବା ପରେ ବିଭାଗୀୟ କନିଷ୍ଠ ଯନ୍ତ୍ରୀ ବେଆଇନ ଭାବରେ ଟଙ୍କା ଅସୁଲି ପାଇଁ ତାଙ୍କର ଅଜାଣତରେ ବିଦ୍ୟୁତ ସଂଯୋଗ ବିଚ୍ଛିନ୍ନ କରିଥିବାର ସେ ଜାଣିବାକୁ ପାଇଛନ୍ତି ବୋଲି ସଙ୍ଗୀନ ଅଭିଯୋଗ କରିଛନ୍ତି । ଏବେ ବିନା ପାଣିରେ ଚାଷ କରାଯାଇଥିବା ଫସଲ ପ୍ରଭାବିତ ହେଲାଣି । ଏଣୁ ଯଥାଶିଘ୍ର ଏହି ବିଷୟର ଉପଯୁକ୍ତ ତଦନ୍ତ କରାଯାଇ ସମସ୍ୟାର ସମାଧାନ ପାଇଁ ଜିଲାପାଳଙ୍କ ନିକଟରେ ଚାଷୀ ଦାବି କରିଛନ୍ତି।
Popular Categories
Previous article
Next article