ଆଠଗଡ : ଫନି ବାତ୍ୟା ସମୟରେ ଗୋବରା, ଛଗାଁ ଓ କୁମାରପୁର ଆଦି ବିଭିନ୍ନ ଗ୍ରାମପଞ୍ଚାୟତରେ ଘରଭଙ୍ଗା ସାହଯ୍ୟ ବଣ୍ଟନରେ ବ୍ୟାପକ ଅନିୟମିତତା ସହ କୋଟି କୋଟି ଟଙ୍କାର ସହାୟତା ରାଶି ହରିଲୁଟ ହୋଇଥିବା ଅଭିଯୋଗ ହୋଇଛି । ଗୋବରା ଗ୍ରାମର ବିଭୂଦେନ୍ଦ୍ର ରଥ ନାମକ ଜଣେ ବ୍ୟକ୍ତି ଏ ସଂକ୍ରାନ୍ତରେ ସୂଚନା ଅଧିକାର ଆଇନ ବଳରେ ଆଠଗଡ଼ ତହସିଲ କାର୍ଯ୍ୟାଳୟରୁ ପାଇଥିବା ତଥ୍ୟରୁ ଏହି ମହାଦୁର୍ନୀତି ପ୍ରଘଟ ହୋଇଛି। କ୍ଷତିଗ୍ରସ୍ତ ମାନଙ୍କ ନାମରେ ଘରଭଙ୍ଗା ସାହଯ୍ୟ ବାବଦରେ ୯୫୧୦୦ ଟଙ୍କା ସେମାନଙ୍କ ବ୍ୟାଙ୍କ ଜମା ଖାତାକୁ ପଠାଯାଇଥିଲା, ତାହା ସେମାନଙ୍କ ଜମାଖାତାକୁ ନଯାଇ ଅଭିନବ ଉପାୟରେ ଅନ୍ୟ କେହି ବ୍ୟକ୍ତି ସେ ଅର୍ଥ ହଡପ କରି ନେଇଥିବା ହିତାଧିକାରୀ ଅଭିଯୋଗ କରିଛନ୍ତି । ଏ ସମ୍ପର୍କରେ ଵିଭିନ୍ନ ଗ୍ରାମପଞ୍ଚାୟତର ହିତାଧିକାରୀ ଯଥା ଗଗନ ବେହେରା, କବିତା ମଳିକ ଓ ଅନ୍ୟ ୩୦ ଜଣ ଆଠଗଡ଼ ତହସିଲଦାରଙ୍କ ଅନୁପସ୍ଥିତିରେ ଅତିରିକ୍ତ ତହସିଲଦାର ଅଶୋକ କୁମାର ସ୍ବାଇଁଙ୍କୁ ଏହି ମର୍ମରେ ଏକ ଲିଖିତ ଅଭିଯୋଗ ପତ୍ର ପ୍ରଦାନ କରିଛନ୍ତି । ପରେ ପରେ ଯୁବସଙ୍ଗଠକ ଅଭୟ କୁମାର ବାରିକଙ୍କ ଦ୍ୱାରା ଆହୁତ ଏକ ସାମ୍ବାଦିକ ସମ୍ମିଳନୀରେ କ୍ଷତିଗ୍ରସ୍ତ ମାନେ ସିଧାସଳଖ ପୁର୍ବତନ ଆଠଗଡ଼ ପଂଚାୟତ ସମିତି ଅଧ୍ୟକ୍ଷ ଓ ଆଠଗଡ଼ ବିଧାୟକ ତଥା କୃଷି ମନ୍ତ୍ରୀଙ୍କୁ ଏହି ମହାଦୁର୍ନୀତି ପାଇଁ ଦାୟୀ କରିଛନ୍ତି। ସେମାନେ କହିଛନ୍ତି ଯେ ରାଜନେତାଙ୍କ ସମର୍ଥନ ନଥିଲେ ଏତେ ବଡ଼ ଦୁର୍ନୀତି ସମ୍ଭବ ହୋଇପାରିବ ନାହିଁ । ଯଦି ମନ୍ତ୍ରୀ ଏହି ଦୁର୍ନୀତିରେ ସଂଶ୍ଲିଷ୍ଟ ନାହାନ୍ତି ତେବେ ସେ ଏହାର ନିରପେକ୍ଷ ତଦନ୍ତ କରାଇ ନିଜ ସ୍ଵଛତାର ପ୍ରମାଣ ଦିଅନ୍ତୁ ଏବଂ ଏଥି ଲାଗି ଦାୟୀ ବ୍ୟକ୍ତିଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ପାଇଁ ପଦକ୍ଷେପ ନିଅନ୍ତୁ ବୋଲି ଅଭୟ ସାମ୍ଵାଦିକ ସମ୍ମିଳନୀରେ ଆହ୍ୱାନ କରିଥିଲେ। ଏହି ସାମ୍ବାଦିକ ସମ୍ମିଳନୀରେ କ୍ଷତିଗ୍ରସ୍ତ ମାନଙ୍କ ସହ ସୁନୀଲ ସୁତାର, ମାନୁଏଲ ପାତ୍ର, ସରୋଜ ଦାସ,ପ୍ରଶାନ୍ତ ରାଉତ ପ୍ରମୁଖ ଉପସ୍ଥିତ ଥିଲେ।
Popular Categories
Previous article
Next article