ସମାଜ ପୋର୍ଟାଲ ଡେସ୍କ: ଗତ ୨୪ ଘଣ୍ଟା ହେବ ଏଭଳି ଏକ ସମ୍ବାଦ ଗଣମାଧ୍ୟମରେ ଘୁରି ବୁଲୁଛି ଯାହାକୁ ସହଜରେ ନା ବିଶ୍ୱାସ କରିହେଉଛି ନା କିଛି କାରଣ ମିଳୁଛି। ସମ୍ପ୍ରତି ଚୀନରେ ବ୍ୟାପିଥିବା କରୋନା ଭୁତାଣୁ ସଂକ୍ରମଣକୁ ନେଇ ହ୍ଵାଟ୍ସଆପ, ଫେସବୁକ ଏବଂ ଏକ ଓଡ଼ିଆ ଖବରକାଗଜ ସମେତ କେତେକ ଜାତୀୟ ଓ ଆନ୍ତର୍ଜାତିକ ଖବରକାଗଜ ମଧ୍ୟ ଏହି ସମ୍ବାଦକୁ ସ୍ଥାନିତ କରିଛନ୍ତି। ତେବେ ଏହି ସମ୍ବାଦଟି ସମ୍ପୂର୍ଣ୍ଣ ଭାବେ ମିଥ୍ୟା ଓ ଗୁଜବ ବୋଲି ଜଣାପଡିଛି।
ସମ୍ବାଦଟି ହେଉଛି ଯେ ଚୀନରେ ବ୍ୟାପୁଥିବା କରୋନା ଭୁତାଣୁ ସଂକ୍ରମଣ ରୋକିବା ପାଇଁ ସେଠାକାର ସରକାର ୨୦ ହଜାର ସଂକ୍ରମିତଙ୍କୁ ହତ୍ୟା କରିବା ପାଇଁ ନ୍ୟାୟାଳୟର ଅନୁମତି ଲୋଡିଛନ୍ତି। ପୂର୍ବରୁ ମିଥ୍ୟା ଓ କପୋଳକଳ୍ପିତ ସମ୍ବାଦ ପରିବେଷଣ କରୁଥିବା ୱେବସାଇଟ ‘ab-tc.com’ର ସିଟି ନିୟୁଜ ଭାଗରେ ଏହି ତଥ୍ୟ ପ୍ରକାଶ ପାଇଛି। ସେଥିରେ ପ୍ରକାଶିତ ଲେଖାରେ ‘China’କୁ ‘Chhina’ ଏବଂ ସର୍ବୋଚ୍ଚ ନ୍ୟାୟାଳୟକୁ ‘The highest level of court in Chhina, Supreme People’s Court’ ବୋଲି ଲେଖା ଅଛି ଯାହା ଗୁରୁତର ବନାନଗତ ଅଶୁଦ୍ଧି। ତେଣୁ ଏଭଳି ସମ୍ବାଦ ଉପରେ ଭରସା କରନ୍ତୁ ନାହିଁ ଓ ପ୍ରଚାର ପ୍ରସାର ମଧ୍ୟ କରନ୍ତୁ ନାହିଁ।
