ନୂଆଦିଲ୍ଲୀ : ବରିଷ୍ଠ କଂଗ୍ରେସ ନେତା ଅଜୟ ମାକେନ୍ ଦିଲ୍ଲୀ ପ୍ରଦେଶ କଂଗ୍ରେସ ସଭାପତି ପଦ ଛାଡ଼ିବାର ୫ ଦିନ ପରେ ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଶୀଲା ଦିକ୍ଷୀତଙ୍କୁ ତାଙ୍କ ସ୍ଥାନରେ ଅବସ୍ଥାପିତ କରାଯାଇଛି। ସ୍ୱାସ୍ଥ୍ୟଗତ କାରଣରୁ ଜାନୁଆରୀ ୪ରେ ନିଜ ପଦରୁ ଇସ୍ତଫା ଦେଇଥିବା ମାକେନ୍ ନୂଆ ପ୍ରଦେଶ କଂଗ୍ରେସ ସଭାପତି ଶୀଲାଙ୍କୁ ଅଭିନନ୍ଦନ ଜଣାଇଛନ୍ତି। ଦିଲ୍ଲୀ କଂଗ୍ରେସ ଦାୟିତ୍ୱରେ ଥିବା ଏଆଇସିସି ସଦସ୍ୟ ପିସି ଚାକୋ କହିଛନ୍ତି ଯେ ପ୍ରଦେଶ କଂଗ୍ରେସର ନୂଆ ସଭାପତି ଭାବେ ଶୀଲାଙ୍କୁ ଓ କାର୍ଯ୍ୟକାରୀ ସଭାପତି ଭାବେ ଦେବେନ୍ଦ୍ର ଯାଦବ, ରାଜେଶ ଲିଲୋଥିଆ, ହାରୁନ ୟୁସୁଫଙ୍କୁ ନିଯୁକ୍ତି ଦିଆଯାଇଛି। ୮୦ ବର୍ଷିୟା ଶୀଲା ଦିକ୍ଷୀତ ବାଦଲି ବିଧାନସଭା ଆସନରୁ ୨ଥର ବିଧାୟିକା ଭାବେ ନିର୍ବାଚିତ ହୋଇଥିବାବେଳେ ଏଆଇସିସି ସମ୍ପାଦକ ଭାବେ କାର୍ଯ୍ୟ କରିଛନ୍ତି। ଶୀଲା ଦିକ୍ଷୀତ ଦିଲ୍ଲୀର ମୁଖ୍ୟମନ୍ତ୍ରୀ ଭାବେ ୧୯୯୮-୨୦୧୩ ପର୍ଯ୍ୟନ୍ତ ସର୍ବାଧିକ ସମୟ କାର୍ଯ୍ୟ କରିଛନ୍ତି।
ପ୍ରକାଶଯୋଗ୍ୟ ଯେ ୨୦୧୫ରେ ଦିଲ୍ଲୀ ପ୍ରଦେଶ କଂଗ୍ରେସର ସଭାପତି ଭାବେ ମାକେନ୍ ଦାୟିତ୍ୱ ଗ୍ରହଣ କରିଥିଲେ। ସ୍ୱାସ୍ଥ୍ୟଗତ କାରଣ ଦର୍ଶାଇ ଗତ ବର୍ଷ ସେପ୍ଟେମ୍ବର ମାସରେ ସେ ଇସ୍ତଫା ଦେବାକୁ ଚାହୁଁଥିଲେ ହେଁ କଂଗ୍ରେସ ହାଇକମାଣ୍ଡ ଏଥିରେ ରାଜି ହୋଇ ନଥିଲେ। ମାକେନ୍ଙ୍କ ଇସ୍ତଫା ପରେ ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଶୀଲା ଦିକ୍ଷୀତ ସେହି ଦାୟିତ୍ୱ ତୁଲାଇବାକୁ ନିଜ ଆଡ଼ୁ ପ୍ରସ୍ତାବ ଦେଇଥିଲେ ।