କାବୁଲ : ଆଫଗାନିସ୍ତାନର ୪ଟି ଚେକପୋଷ୍ଟରେ ଗୁରୁବାର ତାଲିବାନ ଆତଙ୍କବାଦୀଙ୍କ ଆକ୍ରମଣରେ ୩୦ ଜଣ ସୁରକ୍ଷା କର୍ମୀ ଓ ୨ ଜଣ ସାଧାରଣ ଲୋକଙ୍କ ମୃତ୍ୟୁ ଘଟିଛି। ତାଲିବାନ ଆତଙ୍କବାଦୀମାନେ ଆଫଗାନିସ୍ତାନର କୁନ୍ଦୁଜ, ବାଘଲାନ, ତାଖାର ଏବଂ ପଶ୍ଚିମ ବାଦଘିସ୍ ଅଞ୍ଚଳର ଚେକପୋଷ୍ଟ ଉପରେ ଆକ୍ରମଣ କରିଥିଲେ। ତାଲିବାନ ଆତଙ୍କବାଦୀ ଓ ଆଫଗାନିସ୍ତାନରେ ଆମେରିକାର ସ୍ୱତନ୍ତ୍ର ପ୍ରତିନିଧିଙ୍କ ମଧ୍ୟରେ ୩ଟି ପର୍ଯ୍ୟାୟ କଥାବାର୍ତ୍ତା ପରେ ଚଳିତ ସପ୍ତାହରେ ୪ର୍ଥ ପର୍ଯ୍ୟାୟ ଆଲୋଚନା ହେବାକୁ ଥିଲା। ତେବେ ଏହି କଥାବାର୍ତ୍ତାକୁ ତାଲିବାନ ଆତଙ୍କବାଦୀମାନେ ବାତିଲ କରିବା ପରେ ଆଫଗାନିସ୍ତାନ ସୁରକ୍ଷା କର୍ମୀଙ୍କୁ ଆକ୍ରମଣ କରିଛନ୍ତି। କୁନ୍ଦୁଜ ଜିଲା କ୍ୱାଲା-ଇ-ଜାଲ ସଂଗଠନ ମୁଖ୍ୟ ଆହମ ଫାହିମ୍ କହିଛନ୍ତି ଯେ ଗୁରୁବାର ସକାଳେ ବହୁ ସଂଖ୍ୟାରେ ତାଲିବାନ ଆତଙ୍କବାଦୀ ଚେକପୋଷ୍ଟଗୁଡ଼ିକରେ ଆକ୍ରମଣ କରିଥିଲେ। ଏଥିରେ ୧୦ ଜଣ ସୈନ୍ୟ ଏବଂ ପୁଲିସ୍ କର୍ମୀଙ୍କ ମୃତ୍ୟୁ ଘଟିଥିଲା ଓ ୧୧ ଜଣ ଆହତ ହୋଇଥିଲେ। ସେହିପରି ଗୁଳି ବିନିମୟରେ ୨୫ ଜଣ ଆତଙ୍କବାଦୀଙ୍କ ମୃତ୍ୟୁ ଘଟିଛି ବୋଲି ସେ ଦାବି କରିଛନ୍ତି। ବାଘଲାନ ଏବଂ ତାଖାର ଅଞ୍ଚଳରେ ତାଲିବାନ ଆତଙ୍କବାଦୀଙ୍କ ଆକ୍ରମଣରେ ୧୬ ଜଣ ନାଗରିକ ସେନା (ସରକାରୀ ରକ୍ଷୀ)ଙ୍କ ମୃତ୍ୟୁ ଘଟିଛି। ବାଦ୍ଘିସ୍ରେ ତାଲିବାନ ଆତଙ୍କବାଦୀଙ୍କ ଆକ୍ରମଣରେ ୬ ଜଣ ସୁରକ୍ଷା କର୍ମୀଙ୍କ ମୃତ୍ୟୁ ଘଟିଛି ଓ ୧୦ ଜଣ ଆହତ ହୋଇଛନ୍ତି ବୋଲି ପ୍ରଦେଶ ମୁଖ୍ୟ ଜମାଶିଦ୍ ଶାହାବୀ କହିଛନ୍ତି।
