ସମାଜ ଡିଜିଟାଲ ଡେସ୍କ: ମାଓବାଦର ମୂଳୋତ୍ପାଟନ ଶେଷ ପର୍ଯ୍ୟାୟରେ ପହଞ୍ଚିଛି। ଛତିଶଗଡ଼କୁ ମାଓବାଦମୁକ୍ତ କରି ରାଜ୍ୟକୁ ବିକାଶ ପଥରେ ଆଗେଇନେବାକୁ ଆହ୍ବାନ କରିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ। ସୋମବାର ରାୟପୁରଠାରେ ଛତିଶଗଡ଼ ବିଧାନସଭାର ରୌପ୍ୟଜୟନ୍ତୀ ପାଳନ ଉତ୍ସବରେ ରାଷ୍ଟ୍ରପତି ଯୋଗଦେଇ ଏହା କହିଥିଲେ।
ରାଷ୍ଟ୍ରପତି ମୁର୍ମୁ ‘ଜୟ ଜୁହାର’ କହି ସମ୍ବୋଧନ ଆରମ୍ଭ କରିଥିଲେ। ବିଧାନସଭାର ୨୫ତମ ଜୟନ୍ତୀ ପାଇଁ ସେ ରାଜ୍ୟବାସୀଙ୍କୁ ଶୁଭେଚ୍ଛା ଜଣାଇଥିଲେ। ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ ନେତୃତ୍ଵ ସମୟରେ ଏହି ରାଜ୍ୟ ପ୍ରତିଷ୍ଠା ହୋଇଥିବାବେଳେ ରାଷ୍ଟ୍ରପତି ତାଙ୍କ ଦୂରଦର୍ଶୀ ମାର୍ଗଦର୍ଶନକୁ ଶ୍ରଦ୍ଧାଞ୍ଜଳି ଜଣାଇଥିଲେ।
ରାଷ୍ଟ୍ରପତି କହିଥିଲେ ଯେ, ମାଓବାଦକୁ ସମାପ୍ତ କରିବାକୁ ଜୋରଦାର ଆହ୍ବାନ ଏହି ସମାରୋହ ମୁଖ୍ୟ ବିଷୟ ପାଲଟିଛି। ମାଓବାଦ ପ୍ରଭାବିତ ଅଞ୍ଚଳର ଲୋକମାନେ ଏବେ ବିକାଶକୁ ଆପଣାଇବା ଲାଗି ଇଚ୍ଛା ପ୍ରକାଶ କରିଛନ୍ତି। ବାମପନ୍ଥୀ ଉଗ୍ରବାଦ ଦ୍ବାରା ପ୍ରଭାବିତ ବ୍ୟକ୍ତିମାନଙ୍କୁ ସମାଜର ମୁଖ୍ୟଧାରାରେ ସାମିଲ କରିବାର ପ୍ରୟାସ ଏକ ଗୁରୁତ୍ଵପୂର୍ଣ୍ଣ ଏବଂ ନିର୍ଣ୍ଣାୟକ ପର୍ଯ୍ୟାୟରେ ପହଞ୍ଚିଛି। ମାଓବାଦକୁ ସମାପ୍ତ କରିବା ଉପରେ ଗୁରୁତ୍ଵ ଦେଇ ରାଷ୍ଟ୍ରପତି କହିଥିଲେ, ମୋର ଦୃଢ଼ ବିଶ୍ଵାସ ରହିଛି ଯେ ଆପଣମାନଙ୍କ ଅତୁଟ ପ୍ରତିବଦ୍ଧତା ଖୁବଶୀଘ୍ର ଛତିଶଗଡ଼କୁ ସମ୍ପୂର୍ଣ୍ଣ ମାଓବାଦମୁକ୍ତ କରିବ। ଯାହା ରାଜ୍ୟର ଇତିହାସରେ ଏକ ଉଲ୍ଲେଖନୀୟ ଏବଂ ପରିବର୍ତ୍ତନକାରୀ ଅଧ୍ୟାୟର ପଥକୁ ପ୍ରଶସ୍ଥ କରିବ। ସମାଜର ସମସ୍ତ ବର୍ଗଙ୍କୁ ବିକାଶର ମୁଖ୍ୟଧାରାରେ ଏକତ୍ର କରିବାର ଉଦ୍ୟମ ଏକ ମହତ୍ଵପୂର୍ଣ୍ଣ ପର୍ଯ୍ୟାୟରେ ପହଞ୍ଚିଛି, ଯାହାଦ୍ବାରା ମାଓବାଦରୁ ସମ୍ପୂର୍ଣ୍ଣ ରୂପେ ମୁକ୍ତି ମିଳିବାର ଆଶା ଉଜ୍ଜ୍ଵଳ ହୋଇଛି।
ରାଷ୍ଟ୍ରପତି କହିଥିଲେ, ଛତିଶଗଡ଼ ବିଧାନସଭାର ରୌପ୍ୟ ଜୟନ୍ତୀ ଏକ ଐତିହାସିକ ମୁହୂର୍ତ୍ତ। ଏହି ଅବସରରେ ନେତା ଏବଂ ଗଣମାନ୍ୟ ବ୍ୟକ୍ତିବିଶେଷମାନେ ରାଜ୍ୟର ଗଣତାନ୍ତ୍ରିକ ଯାତ୍ରାର ଉତ୍ସବ ମନାଇଛନ୍ତି। ରାଜ୍ୟର ଭବିଷ୍ୟତ ଗଢ଼ିବାରେ ଏକତା, ସଶକ୍ତିକରଣ ଏବଂ ବିକାଶ ଗୁରୁତ୍ଵପୂର୍ଣ୍ଣ। ଛତିଶଗଡ଼ର ସମୃଦ୍ଧ ସାଂସ୍କୃତିକ ଐତିହ୍ୟ ଏବଂ ମାତୃଶକ୍ତି ଉପରେ ଗୁରୁତ୍ଵ ଦେଇ ରାଷ୍ଟ୍ରପତି ୧୯ ମହିଳା ବିଧାୟକଙ୍କୁ ମହିଳା ସଶକ୍ତିକରଣ ଓ ସମାବେଶୀ ବିକାଶକୁ ପ୍ରୋତ୍ସାହିତ କରିବା, ନାରୀ ଶକ୍ତି ବନ୍ଦର ଅଧିନିୟମ ସହିତ ଯୋଡ଼ିହେବାକୁ ପରାମର୍ଶ ଦେଇଥିଲେ। ରାଷ୍ଟ୍ରପତି ଛତିଶଗଡ଼ର ପ୍ରଥମ ମହିଳା ସାଂସଦ ମିନି ମାତାଙ୍କ ପ୍ରଶଂସା କରି ସେ ମହିଳା ନେତାମାନଙ୍କ ଲାଗି ପ୍ରେରଣା ବୋଲି କହିଥିଲେ।
Comments are closed.