କେନ୍ଦୁଝରଗଡ : ସଦର ତହସିଲ ଅଧିନ ମଣ୍ଡୁଆ ପଞ୍ଚାୟତ କାର୍ଯ୍ୟାଳୟକୁ ଲାଗି ଦୀର୍ଘବର୍ଷ ଧରି ଥିବା ସରକାରୀ ଆମ୍ବତୋଟାକୁ କେନ୍ଦୁଝରଗଡ ପୌରାଞ୍ଚଳ ୧୦ନଂ ୱାର୍ଡର ପୂର୍ବତନ କାଉନସିଲର ମରୁଆ ନାଏକ ତଞ୍ଚକତାପୂର୍ବକ ନିଜ ନାମରେ ପଟ୍ଟା ହାତେଇ ଗୃହ ନିର୍ମାଣକୁ ମଣ୍ଡୁଆ ଗ୍ରାମବାସୀ ତୀବ୍ର ବିରୋଧ କରିଛନ୍ତି। ସ୍ଥାନୀୟ ୱାର୍ଡ ସଭ୍ୟା ସବିତା ନାଏକଙ୍କ ନେତୃତ୍ୱରେ ଗ୍ରାମର ଶତାଧିକ ମହିଳା ମଙ୍ଗଳବାର ଓ ବୁଧବାର ଦୁଇଦିନ ଧରି କେନ୍ଦୁଝର ଉପଜିଲାପାଳଙ୍କ କାର୍ଯ୍ୟାଳୟରେ ଉପସ୍ଥିତ ରହି ବେଆଇନ ଭାବେ ହାତେଇଥିବା ଜମି ପଟ୍ଟାକୁ ପ୍ରତ୍ୟାହାର କରି ସର୍ବସାଧାରଣଙ୍କ ପାଇଁ ଉଦ୍ଦିଷ୍ଟ ଆମ୍ବତୋଟାକୁ ମଧ୍ୟ ଜବରଦଖଲ ମୁକ୍ତ କରିବା ପାଇଁ ଦାବି କରିଛନ୍ତି।ଗତ କିଛିବର୍ଷ ତଳେ ମଧ୍ୟ ଉକ୍ତ ଆମ୍ବତୋଟାରେ ଗୃହ ନିର୍ମାଣ କାର୍ଯ୍ୟ ଆରମ୍ଭ ହୋଇଥିବା ବେଳେ ଗ୍ରାମବାସୀଙକ ବିରୋଧ ଯୋଗୁଁ ସ୍ଥିଗିତ ରଖାଯାଇଥିବା ବେଳେ ପୁଣି ଗତ କିଛି ଦିନ ଧରି ଗୃହ ନିର୍ମାଣ କାର୍ଯ୍ୟ ଆରମ୍ଭ ହୋଇଥିବାରୁ ଗ୍ରାମବାସୀ ଉକ୍ତ ନିର୍ମାଣ କାର୍ଯ୍ୟକୁ ତୁରନ୍ତ ବନ୍ଦ କରିବା ପାଇଁ ଉପଜିଲାପାଳଙ୍କ ନିକଟରେ ଗୁହାରୀ କହିଛନ୍ତି। ସର୍ବସାଧାରଣଙକ ପାଇଁ ଉଦ୍ଦିଷ୍ଟ ଆମ୍ବତୋଟାକୁ କିଭଳି ଭାବେ ଜଣେ ବ୍ୟକ୍ତିଙ୍କ ନାମରେ ତହସିଲ ପ୍ରଶାସନ ପଟ୍ଟା ପ୍ରଦାନ କଲେ ସେ ନେଇ ଗ୍ରାମବାସୀ ଉତ୍ତରାଞ୍ଚଳ ରାଜସ୍ୱ କମିଶନର, ରାଜସ୍ୱ ମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ ନିକଟରେ ଫେରାଦ ହେବାସହ ବେଆଇନ ଭାବେ ପ୍ରଦାନ କରାଯାଇଥିବା ପଟ୍ଟାକୁ ପ୍ରତ୍ୟାହାର କରିବା ସହ ଆମ୍ବତୋଟାକୁ ଜବରଦଖଲ ମୁକ୍ତ କରିବାକୁ ଗ୍ରାମବାସୀ ଦାବି କରିଛନ୍ତି। ଆସନ୍ତା ରବିବାର ସୁଦ୍ଧା ବେଆଇନ ଭାବେ ପ୍ରଦାନ କରାଯାଇଥିବା ପଟ୍ଟା ପ୍ରତ୍ୟାହାର ସହ ଆମ୍ବତୋଟାକୁ ଜବରଦଖଲ ମୁକ୍ତ କରାନଗଲେ ବାଧ୍ୟ ହୋଇ ସୋମବାର ଠାରୁ ପଞ୍ଚାୟତ କାର୍ଯ୍ୟାଳୟ ସମ୍ମୁଖରେ ରାସ୍ତା ଅବରୋଧପୂର୍ବକ ଆନ୍ଦୋଳନ କରିବୁ ବୋଲି ସରସ୍ୱତୀ ନାଏକ, ବିମଳା ନାଏକ, ମମତା ନାଏକ, ହାରାମଣୀ ନାଏକଙ୍କ ସମେତ ଶତାଧିକ ମହିଳା ଚେତାବନୀ ଦେଇଛନ୍ତି ।
Comments are closed.