ନୂଆଦିଲ୍ଲୀ, ପରିବେଶ ସୁରକ୍ଷା ପାଇଁ ଗଠିତ ୧ ଲକ୍ଷ କୋଟି ଟଙ୍କାର ପାଣ୍ଠିର ହିସାବ ମାଗିଛନ୍ତି ସୁପ୍ରିମକୋର୍ଟ। କେମିତି ଓ କେବେ ଏହି ପାଣ୍ଠି ଖର୍ଚ୍ଚ ହୋଇଛି ବା ଖର୍ଚ୍ଚ କରିବା ଯୋଜନା ରଖାଯାଇଛି ସେ ସଂକ୍ରାନ୍ତରେ ସବିଶେଷ ତଥ୍ୟ ଦେବାକୁ କେନ୍ଦ୍ର ପରିବେଶ, ଜଙ୍ଗଲ ଓ ଜଳବାୟୁ ପରିବର୍ତ୍ତନ ମନ୍ତ୍ରାଳୟକୁ ଜଷ୍ଟିସ୍ ମଦନ ବି ଲୋକୁର ଓ ଜଷ୍ଟିସ୍ ଦୀପକ ଗୁପ୍ତାଙ୍କୁ ନେଇ ଗଠିତ ଖଣ୍ଡପୀଠ ନିର୍ଦେଶ ଦେଇଛନ୍ତି। ମନ୍ତ୍ରାଳୟ ପକ୍ଷରୁ ଅତିରିକ୍ତ ସଲିସିଟର ଜେନେରାଲ୍ ଏ ଏନ୍ଏସ୍ ନାଦକର୍ଣ୍ଣୀ ପକ୍ଷ ରଖିଛନ୍ତି। ଉଲ୍ଲେଖନୀୟ ହେଉଛି ଓଡ଼ିଶା ସରକାର ଏହି ପାଣ୍ଠିକୁ ରାସ୍ତା ନିର୍ମାଣ, ବସ୍ ଷ୍ଟାଣ୍ଡର ପୁନରୁଦ୍ଧାର ଓ କଲେଜ୍ରେ ବିଜ୍ଞାନାଗାର ନିର୍ମାଣ ଲାଗି ଖର୍ଚ୍ଚ କରାଯାଇଥିବା ମୁଖ୍ୟଶାସନ ସଚିବ ସତ୍ୟପାଠ ମାଧ୍ୟମରେ ଜଣାଇଥଲେ। ଏହାପରେ ଖଣ୍ଡପୀଠ ଅସନ୍ତୋଷ ପ୍ରକାଶ କରିବା ସହିତ ଏହି ଜନକଲ୍ୟାଣ ପାଇଁ ଆସିଥିବା ପାଣ୍ଠି ସରକାରୀ କାମରେ ଖର୍ଚ୍ଚ କରାଯାଇପାରିବ ନାହିଁ ବୋଲି କହିଥିଲେ। ମେ ୯ ତାରିଖରେ ସତ୍ୟପାଠ ମାଧ୍ୟମରେ ଏ ବାବଦରେ ଅଧିକ ତଥ୍ୟ ରଖିବାକୁ ଓଡ଼ିଶା ମୁଖ୍ୟ ଶାସନ ସଚିବଙ୍କୁ ଖଣ୍ଡପୀଠ ନିର୍ଦେଶ ଦେଇଛନ୍ତି।
