କଲ୍ୟାଣସିଂହପୁର: ରାୟଗଡା ଜିଲ୍ଲା କଲ୍ୟାଣସିଂହପୁର ରେଞ୍ଜରେ ୨୮ ଟିକିଆ ହାତୀପଲ ଘୂରି ବୁଲୁଥିବା ଦେଖିବାକୁ ମିଳିଛି। ହାତୀପଲଙ୍କୁ ଦେଖି ଅଞ୍ଚଳବାସୀ ଭୟଭୀତ ଅବସ୍ଥାରେ ରହିଛନ୍ତି। ସିଙ୍ଗାରି ବିଟ ରେ ଦୁଇଟି ଓ ନିୟମଗିରି ଅଞ୍ଚଳର ଲାଖପଦର ଓ ଡ଼ଙ୍ଗାମାଟି ଗ୍ରାମ ଅଞ୍ଚଳରେ ଏହି ହାତୀମାନେ ବୁଲୁଥିବା ଦେଖିବାକୁ ମିଳିଛି।
ହାତୀ ଲାଞ୍ଜିଗଡ ରେଞ୍ଜ ଓ କଲ୍ୟାଣସିଂହପୁର ରେଞ୍ଜ ମଧ୍ୟରେ ବୁଲୁଥିବାବେଳେ କିଛିଦିନ ତଳେ ଏକ ଛୋଟ ପିଲାକୁ ଶୁଣ୍ଢରେ ବୁଲାଇ ମାରିଦେଇଥିଲେ। ନିୟମଗିରି ପାହାଡ଼ରେ ବସବାସ କରୁଥିବା ଡ଼ଙ୍ଗରିଆ କନ୍ଧ ଗ୍ରାମରେ ପଶି ଫସଲ ନଷ୍ଟ, ପାଇପ ଉପାଡିବା ସହ ଘରେ ପଶି ଖାଦ୍ୟ ଶସ୍ୟ ନଷ୍ଟ କରି ଘର ଭାଙ୍ଗିଦେଇଥିଲେ। ଏହାକୁ ନେଇ କଲ୍ୟାଣସିଂହପୁର ବନବିଭାଗ ପକ୍ଷରୁ ବନପାଳ ଭଗବାନ ସାରକା, ବନରଖି ତେଜସ୍ୱନୀ ସାହୁ ସମେତ ହାତୀ ସ୍କ୍ବାଡ୍ ଦଳ ଉକ୍ତ ଅଞ୍ଚଳରେ ପରିଦର୍ଶନ କରି ହାତୀକୁ ଘଉଡ଼ାଇଛନ୍ତି। ହାତୀଙ୍କୁ ବିରକ୍ତ ନ କରିବା ପାଇଁ ଲୋକଙ୍କୁ ସଚେତନ କରାଇବା ସହିତ ହାତୀ ଦେଖିଲେ ତୁରନ୍ତ ବନ ବିଭାଗକୁ ସୂଚନା ଦେବା ଲାଗି ପରାମର୍ଶ ଦେଇଛନ୍ତି।
