ସମାଜ ଡିଜିଟାଲ ଡେସ୍କ: କେନ୍ଦୁଝର ଜିଲା ଘଷିପୁରା ଥାନା ଅନ୍ତର୍ଗତ ନଦୁଆ ଗାଁ ନିକଟରେ ରବିବାର ଏକ ବୀଭତ୍ସ ହତ୍ୟାକାଣ୍ଡ ଘଟିଛି। ଜଣେ ବ୍ୟକ୍ତି ଡମ୍ପର ଚଢ଼ାଇ ଦୁଇଜଣଙ୍କୁ ହତ୍ୟା କରିଥିବା ଅଭିଯୋଗ ହୋଇଛି। ପୁଲିସ ଘଟଣାସ୍ଥଳରେ ପହଞ୍ଚି ଅଭିଯୁକ୍ତକୁ ଅଟକ ରଖି ତଦନ୍ତ ଚଳାଇଛି।
ସୂଚନା ଅନୁସାରେ, ପୂର୍ବ ଶତ୍ରୁତା ଯୋଗୁ ଏହି ହତ୍ୟାକାଣ୍ଡ ଘଟିଛି। ଅଭିଯୁକ୍ତ ଜଣକ ସ୍ଥାନୀୟ ଅଞ୍ଚଳର ଜଣେ ବ୍ୟକ୍ତିଙ୍କ ଡମ୍ପର ଚଳାଉଥିଲେ। ରବିବାର ମଧ୍ୟାହ୍ନରେ ସେ ଗାଁ ନିକଟରେ ପାଣ୍ଡୁ ପୃଷ୍ଟି ଏବଂ ସଞ୍ଜୁଲତା ପଲେଇଙ୍କ ଉପରେ ଡମ୍ପର ଚଢ଼ାଇ ଦେଇଥିଲେ। ପ୍ରତ୍ୟକ୍ଷଦର୍ଶୀଙ୍କ ସୂଚନା ଅନୁସାରେ, ପାଣ୍ଡୁ ଜୀବନ ବଞ୍ଚାଇବାକୁ ଦୌଡ଼ୁଥିବାବେଳେ ଅଭିଯୁକ୍ତ ଡମ୍ପରରେ ଗୋଡ଼ାଇ ଗୋଡ଼ାଇ ତାଙ୍କ ଉପରେ ଚଢ଼ାଇ ହତ୍ୟା କରିଥିଲା। ସେହିପରି ଅନ୍ୟ ମୃତା ସଞ୍ଜୁଲତାଙ୍କୁ ବି ଅନୁରୂପ ଭାବେ ହତ୍ୟା କରିଛି। ସ୍ଥାନୀୟ ଲୋକେ ଅଭିଯୁକ୍ତକୁ କାବୁ କରି ପୁଲିସ ଜିମା ଦେଇଛନ୍ତି। ମୃତ ବ୍ୟକ୍ତି ଦୁଇଜଣ ଅଭିଯୁକ୍ତର ସମ୍ପର୍କୀୟ ବୋଲି ଜଣାପଡ଼ିଛି।
