ଭୁବନେଶ୍ୱର : ନିର୍ବାଚନ ଆଚରଣ ବିଧି ଉଲଂଘନ କରିବା ନେଇ ଆଜି ବିଜେପି ବିରୋଧରେ ମୁଖ୍ୟ ନିର୍ବାଚନ ଅଧିକାରୀଙ୍କ ନିକଟରେ ପୁଣି ଥରେ ଫେରାଦ ହୋଇଛି ବିଜେଡି। ନିର୍ବାଚନ ପ୍ରଚାରରେ ଆଜି ଭବାନୀପାଟଣା ଆସିଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଭାଷଣକୁ ବିନା ଅନୁମତିରେ ବିଜେପି ମୋବାଇଲ୍ରେ ଭଏସ୍ ମ୍ୟାସେଜ୍ ଜରିଆରେ ସିଧା ପ୍ରସାରଣ କରିଛି। ବିଜେଡି ମୁଖପାତ୍ର ଡ଼ ସସ୍ମିତ ପାତ୍ର କହିଛନ୍ତି ଯେ ନିର୍ବାଚନ ସଭାର ପ୍ରସାରଣ ପାଇଁ ମିଡିଆ ସାର୍ଟିଫିକେସନ୍ ଆଣ୍ଡ ମନିଟରିଂ କମିଟି ଠାରୁ ଆଗୁଆ ଅନୁମତି ନେବାର ଆବଶ୍ୟକତା ରହିଛି। କିନ୍ତୁ ବିଜେପି ନିର୍ବାଚନ କମିଶନଙ୍କର ନିର୍ଦେଶକୁ ଅଣଦେଖା କରି ବିନା ଅନୁମତିରେ ମୋଦିଙ୍କ ଭାଷଣକୁ ମୋବାଇଲ୍ରେ ପ୍ରସାରଣ କରିଛି। ଏକ ନିର୍ଦ୍ଦିଷ୍ଟ ନମ୍ବରକୁ ଫୋନ୍ କଲେ ମୋଦିଙ୍କ ଭାଷଣର ସିଧା ପ୍ରସାରଣ ଶୁଣିବାକୁ ମିଳୁଥିଲା। ଆଇନ୍ ଅମାନ୍ୟ କରିଥିବାରୁ ବିଜେପି ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ସହ ଏ ବାବଦରେ ହୋଇଥିବା ଖର୍ଚ୍ଚକୁ କଳାହାଣ୍ଡି ଲୋକସଭା ଆସନ ପ୍ରାର୍ଥୀ ଓ ଭବାନୀପାଟଣା ବିଧାନସଭା ପ୍ରାର୍ଥୀଙ୍କ ନିର୍ବାଚନୀ ଖର୍ଚ୍ଚରେ ମିଶାଇବାକୁ ବିଜେଡି ଦାବି କରିଛି। ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟିଥିବା ଏହି ପ୍ରତିନିଧୀ ଦଳରେ ଅନ୍ୟମାନଙ୍କ ମଧ୍ୟରେ ମୁଖପାତ୍ର ଲେଲିନ୍ ମହାନ୍ତି, ସୁଲତା ଦେଓ ଏବଂ ସୁଲୋଚନା ଦାସ ସାମିଲ୍ ହୋଇଥିଲେ।
Comments are closed.