କଟକର ୩୦ ସ୍ଥାନରେ ହେବ ଦୋଳ ମେଳଣ

ସମାଜ ଡିଜିଟାଲ ଡେସ୍କ: ଭାଇଚାରାର ସହର କଟକରେ ଆରମ୍ଭ ହୋଇଯାଇଛି ଦୋଳଯାତ୍ରା। ଦୋଳ ଦଶମୀରୁ ଆରମ୍ଭ ହୋଇ ଏହା ପୂର୍ଣ୍ଣିମା ପର୍ଯ୍ୟନ୍ତ ଚାଲିବ। ଠାକୁରଙ୍କୁ ସୁସଜ୍ଜିତ ବିମାନରେ ବସାଇ ଗାଁ ପରିକ୍ରମା କରାଯାଉଛି। ଏହି ସମୟରେ ଠାକୁର ଲୋକଙ୍କ ଘର ଆଗରେ ଭୋଗ ଖାଇଥାଆନ୍ତି। ଏହି ଅବସରରେ ବିଭିନ୍ନ ସ୍ଥାନରେ ମେଳଣ ଅନୁଷ୍ଠିତ ହୋଇଥାଏ। ଚଳିତ ଥର କଟକର ୩୦ ସ୍ଥାନରେ ମେଳଣ ଅନୁଷ୍ଠିତ ହେବ ବୋଲି ବାସ୍ତରି(୭୨)’ ସଂକୀର୍ତ୍ତନ ମଣ୍ଡଳୀର କାର୍ଯ୍ୟକାରୀ ସଭାପତି ସୁରେଶ କୁମାର ସାହୁ କରିଛନ୍ତି। ସବୁ ମେଳଣ ସ୍ଥଳୀରେ ସୁରକ୍ଷା ବ୍ୟବସ୍ଥା ଦାୟିତ୍ବରେ କମିସନରେଟ ପୁଲିସ ପକ୍ଷରୁ ବ୍ୟବସ୍ଥା କରାଯିବ। ଦୋଳ କାର୍ଯ୍ୟକ୍ରମ ପାଇଁ ଅନୁମତି ପ୍ରଦାନ ପ୍ରକ୍ରିୟାକୁ ସରଳୀକୃତ କରିବା ଲାଗି ଦୋଳମେଳଣ ସଂଯୋଜକ ଦେବେନ୍ଦ୍ର ସାହୁ ପୁଲିସ ପ୍ରଶାସନକୁ ନିବେଦନ କରିଛନ୍ତି।

ଦୋଳଯାତ୍ରା ସମୟରେ ଗ୍ରାମର ମୁରବି, ଯୁବକ ସଂଘ ସମସ୍ତେ ସାମିଲ ହୋଇ ବିଳମ୍ବିତ ରାତି ପର୍ଯ୍ୟନ୍ତ ହରିନାମ ସହିତ ବିମାନକୁ କାନ୍ଧରେ ଧରି ସାହି ପରିକ୍ରମା କରିଥାନ୍ତି। ଦୋଳ ଦଶମୀରୁ ଗର୍ଭଗୃହର ସିଂହାସନରୁ ରାଧାକୃଷ୍ଣ ବାହାରି ବିମାନରେ ଅଧିଷ୍ଠିତ ହୋଇ ଗ୍ରାମ ପରିକ୍ରମା କରନ୍ତି ଓ ପୂର୍ଣ୍ଣିମା ଦିନ ତାଙ୍କ ସମ୍ମୁଖରେ ନୂତନ ପଞ୍ଜିକା ପାଠ ପରେ ପୁନଃ ଠାକୁର ମନ୍ଦିରରେ ପ୍ରବେଶ କରିଥାଆନ୍ତି। ଏହା ମଧ୍ୟରେ ସହରର ବିଭିନ୍ନ ସ୍ଥାନରେ ରାତ୍ରିରେ ମେଳଣ ଅନୁଷ୍ଠିତ ହୁଏ ଓ ବିଭିନ୍ନ ସାହିର ବିମାନ ଏକ ନିର୍ଦ୍ଦିଷ୍ଟ ମେଲଣରେ ନିର୍ଦ୍ଦିଷ୍ଟ ଦିନ ଉପସ୍ଥିତ ହୋଇ ଭୋଗ ଖାଇଥାଆନ୍ତି।