କଲମପୁର/ ଧର୍ମଗଡ଼: କଳାହାଣ୍ଡି ଜିଲ୍ଲା ଧର୍ମଗଡ଼ ସହ ରାଜ୍ୟର ୩୦ଟି ସ୍ଥାନରେ ନୂତନ ଅତ୍ୟାଧୁନିକ କୋର୍ଟ ଗୃହ ନିର୍ମାଣ ପାଇଁ ବୁଧବାର ଆଭାସି ମାଧ୍ୟମରେ ଓଡିଶା ଉଚ୍ଚ ନ୍ୟାୟଳୟର ମାନ୍ୟବର ମୁଖ୍ୟ ବିଚାରପତି ଶ୍ରୀଯୁକ୍ତ ଚକ୍ରଧାରୀ ଶରଣସିଂ ଭିତ୍ତିପ୍ରସ୍ତର ସ୍ଥାପନ କରିଛନ୍ତି । କୋଠା ନିର୍ମାଣ କମିଟି ଅଧ୍ୟକ୍ଷ ତଥା ବିଚାରପତି ଡ଼.ଜଷ୍ଟିସ ବିଦ୍ୟୁତ ରଞ୍ଜନ ଷଡ଼ଙ୍ଗୀ, କଳାହାଣ୍ଡି ପୋର୍ଟଫୋଲିଓ ବିଚାରପତି ଶ୍ରୀଯୁକ୍ତ ଭି. ନରସିଂହ ତଥା ଅନ୍ୟାନ୍ୟ ବିଚାରପତି ଓ ପଦାଧିକାରୀ ଙ୍କ ଉପସ୍ଥିତିରେ ରାଜ୍ୟର ୧୭ ଜିଲ୍ଲାରେ ସିଭିଲ କୋର୍ଟ ପାଇଁ ଭିତ୍ତିପ୍ରସ୍ତର ସ୍ଥାପନ କରାଯାଇଛି।
ଧର୍ମଗଡ଼ ବିଜୁ ଏକ୍ସପ୍ରେସକୁ ଲାଗି ଚିହ୍ନଟ କରାଯାଇଥିବା ସ୍ଥାନରେ ନୂତନ କୋର୍ଟ ଗୃହ ଭିତ୍ତିପ୍ରସ୍ତର ସ୍ଥାପନ କରାଯାଇଛି। ଏହି ଅବସରରେ କଳାହାଣ୍ଡି ଜିଲ୍ଲା ଜଜ ଶ୍ରୀ ଦୀପ୍ତି ରଞ୍ଜନ କାନୁନଗୋ ଙ୍କ ତତ୍ୱାବଧାନରେ ଧର୍ମଗଡ଼ ଅତିରିକ୍ତ ଜିଲ୍ଲା ଦୌରା ଜଜ ଶ୍ରୀଯୁକ୍ତ ସୁରେଶ ଚନ୍ଦ୍ର ପ୍ରଧାନ, ବରିଷ୍ଠ ଦେୱାନୀ ବିଚାରପତି ଶ୍ରୀଯୁକ୍ତ ବିଶ୍ୱ ବିସୃତ କର, ଉପଖଣ୍ଡ ବିଚାର ବିଭାଗୀୟ ବିଚାରପତି ଶ୍ରୀମତୀ ପ୍ରଜ୍ଞା ପାରମିତା ସ୍ୱାଇଁ ଉପସ୍ଥିତ ଥିଲେ । ଧର୍ମଗଡ଼ ଓକିଲ ସଂଘର ସଭାପତି ଶ୍ରୀ ପ୍ରସନ୍ନ କୁମାର ଅଗସ୍ତି, ସମ୍ପାଦକ ଶ୍ରୀ ବିଶ୍ୱନାଥ ମୁଣ୍ଡ ଓ ଅନ୍ୟାନ୍ୟ ବରିଷ୍ଠ ସଦସ୍ୟ ସହ ସମସ୍ତ ଓକିଲ ଓ ବିଚାରାଳୟ ର କର୍ମଚାରୀ ବୃନ୍ଦ ଯୋଗଦାନ କରିଥିଲେ ।
