ଆରଡି ଅଞ୍ଚଳରେ ୨ଦିନ ହେଲା ଲାଗି ରହିଛି ଅଦିନିଆ ଝଡବର୍ଷା 

ଆରଡି : ଗତ ୨ଦିନ ହେବ ଅଦିନିଆ ଝଡବର୍ଷା ଯୋଗୁଁ ଆରଡି ପୀଠ ସମେତ ଆଖପାଖ ଅଞ୍ଚଳରେ ଲଗାଣ ବର୍ଷା, ବଜ୍ରପାତ ଓ ଝଡତୋଫାନ ଲାଗି ରହିଛି। ଯାହାଫଳରେ ବୈତରଣୀ ଓ ସାଳନ୍ଦୀ ନଦୀକୁ ମାଛ ମାରିବା ପାଇଁ ଯାଉଥିବା ମତ୍ସ୍ୟଜୀବୀମାନେ ମାଛଧରା ବୋଟ ନଦୀକୂଳରେ ଲଙ୍ଗର ପକାଇ ବସି ରହିଛନ୍ତି। ତାହାସହ ଅଦିନିଆ ବର୍ଷାରେ ଖାଲୁଆ ଅଞ୍ଚଳ ସମେତ ଅନେକ ଚାଷଜମିରେ ପାଣି ଜମି ରହିବା ଫଳରେ ଖରାଟିଆ ପନିପରିବା ଚାଛ ନଷ୍ଟ ହେବାକୁ ବସିଛି। ବିଶେଷକରି ଆଗକୁ ପୂର୍ଣ୍ଣିମାତିଥି ଥିବାରୁ ଉଭୟ ନଦୀରେ ଉଚ୍ଚ ଜୁଆର ପ୍ରବାହିତ ହେଉଥିବାରୁ ନଦୀ ଫୁଲି ଉଠୁଛି। ଅନ୍ଯପଟେ ଲଗାଣବର୍ଷା ଓ ଝଡତୋଫାନ ଲାଗି ରହିଥିବାରୁ ଆରଡିପୀଠର ଆରାଧ୍ୟଦେବ ବାବା ଆଖଣ୍ଡଳମଣିଙ୍କ ମନ୍ଦିର ଭକ୍ତ ଶୂନ୍ୟ ହୋଇପଡିଛି। ସେଠାରେ ଅନେକ ଦୋକାନ ବଜାର ବନ୍ଦ ରହିଥିବା ଦେଖିବାକୁ ମିଳିଛି।