ଲାଞ୍ଜିଗଡ଼: ବିଶ୍ୱନାଥପୁର ନିକଟସ୍ଥ ପୋଖରୀବନ୍ଧରେ ବିରାଟ ଧନୁଯାତ୍ରା ମହୋତ୍ସବ ରବିବାର ଉଦଘାଟିତ ହୋଇଯାଇଛି । ଏହି ଧନୁଯାତ୍ରାରେ ମୁଖ୍ୟଅତିଥି ଭାବେ ପୂର୍ବତନ ମନ୍ତ୍ରୀ ବଳଭଦ୍ର ମାଝୀ ଯୋଗଦେଇ ଉଦଘାଟନ କରିଥିବା ବେଳେ ସମ୍ମାନୀତ ଅତିଥି ଭାବେ ପୋଖରୀବନ୍ଧ ସରପଞ୍ଚ ସସ୍ମିତା ମାଝୀ, ଦୀପକ ମହାପାତ୍ର, ନିରଞ୍ଜନ ପାତ୍ର, ଗୋବିନ୍ଦ ପ୍ରଧାନୀ ପ୍ରମୁଖ ଯୋଗଦେଇଥିଲେ । ଧନୁଯାତ୍ରା ଆୟୋଜନ କମିଟିର ସଭାପତି ରମେଶ ଚନ୍ଦ୍ର ସାହୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉଦଘାଟନ ସଭାରେ ଅନ୍ୟମାନଙ୍କ ମଧ୍ୟରେ କମିଟିର ସାଧାରଣ ସମ୍ପାଦକ ଭବାନୀ ଶଙ୍କର ବାଣୁଆ, କାର୍ଯ୍ୟକାରୀ ସଭାପତି ସନାତନ ବିଶି, ଉପ ସଭାପତି କର୍ଣ୍ଣ ମାଝୀ, ପବିତ୍ର ବିଭାର, କୋଷାଧ୍ୟକ୍ଷ ଜୟୀମୁନି ବେହେରା, ଶଙ୍କର ପ୍ରଧାନୀ, ସମ୍ପାଦକ ବିକ୍ରମାଦିତ୍ୟ ବାରିକ, ଯୁଗ୍ମ ସମ୍ପାଦକ ଭଗବାନ ରାଉତ ଉପସ୍ଥିତ ଥିବା ବେଳେ ମୁଖ୍ୟବକ୍ତା ଭାବରେ ଟଙ୍କଧର ମାଝୀ ଯୋଗଦେଇଥିଲେ । ଧନୁଯାତ୍ରାର ପ୍ରଥମ ଦିବସରେ କଂସ ଭୁମିକାରେ ଅଭିନୟ କରୁଥିବା ନରେନ୍ଦ୍ର ପ୍ରଧାନ ଏବଂ ତାଙ୍କ ସହଯୋଗୀମାନେ ମଥୁରାନଗରୀରେ ମହାରାଜ ଉଗ୍ରସେନଙ୍କ ନଗର ପରିକ୍ରମା, ଦେବକୀ ବସୁଦେବଙ୍କ ଶୁଭବିବାହ, ଯୁବରାଜ କଂସଙ୍କ ମୃଗୟାଯାତ୍ରାରୁ ପ୍ରତ୍ୟାବର୍ତ୍ତନ, ଉଗ୍ରସେନଙ୍କୁ ଗାଦିଚ୍ୟୁତ କରି କଂସଙ୍କ ରାଜସିଂହାସନ ଆରୋହଣ, ଦୈବବାଣୀ ଓ ବସୁଦେବଙ୍କ କାରାବରଣ ଆଦି ଦୃଶ୍ୟ ମଞ୍ଚସ୍ଥ ହୋଇଥିଲା । ତେବେ ପ୍ରଥମ ଥର ପାଇଁ ପୋଖରୀବନ୍ଧଠାରେ ଆୟୋଜିତ ହେଉଥିବା ଧନୁଯାତ୍ରା ମହୋତ୍ସବକୁ ନେଇ ଅଞ୍ଚଳବାସିଙ୍କ ମଧ୍ୟରେ ଉତ୍ସୁକତା ଦେଖାଦେଇଥିବା ବେଳେ ପ୍ରଥମ ଦିନରେ ହିଁ ବେସ ଜନସମାଗମ ପରିଲକ୍ଷିତ ହୋଇଥିଲା । ସେହିପରି ଉତ୍ସବକୁ ଆହୁରି ସରସ ସୁନ୍ଦର କରିବା ପାଇଁ ଧନୁଯାତ୍ରା ପରିଚାଳନା କମିଟି ତରଫରୁ ମିନାବଜାର ଓ ଅପେରାର ପରିକଳ୍ପନା କରାଯାଇଥିବା ବେଳେ ଏଥିରେ ମଧ୍ୟ ଲୋକଙ୍କ ଭିଡ ଦେଖିବାକୁ ମିଳିଥିଲା ।
Popular Categories
Previous article
Next article