ଚାପଗ୍ରସ୍ତ ପାଇଲଟଙ୍କୁ ଯୋଗ ଶିକ୍ଷା ଦେବ ଏୟାର ଇଣ୍ଡିଆ

ନୂଆଦିଲ୍ଲୀ: ଜୁନ୍‌ ୧୨ ଅହମ୍ମଦାବାଦ ବିମାନ ଦୁର୍ଘଟଣା ପରେ ଅତ୍ୟଧିକ ମାନସିକ ଚାପଗ୍ରସ୍ତ ଥିବା ପାଇଲଟଙ୍କ ସମେତ କ୍ରୁ ସଦସ୍ୟଙ୍କ ପାଇଁ ଅନ୍‌ଲାଇନ୍‌ରେ ଯୋଗ ଶିକ୍ଷା ଆରମ୍ଭ କରିବାକୁ ଯାଉଛି ଏୟାର ଇଣ୍ଡିଆ। ଅହମ୍ମଦାବାଦ ଦୁର୍ଘଟଣା ପରେ ବେସାମରିକ ବିମାନ ଚଳାଚଳ ନିର୍ଦେଶାଳୟ (ଡିଜିସିଏ) ତୁରନ୍ତ ପ୍ରମୁଖ ଭାରତୀୟ ଏୟାରଲାଇନ୍ସଙ୍କୁ ସେମାନଙ୍କ ବିମାନ କର୍ମଚାରୀଙ୍କ ପାଇଁ ଆଘାତ ପରବର୍ତ୍ତୀ ମାନସିକ ସ୍ୱାସ୍ଥ୍ୟ କର୍ମଶାଳା ଆୟୋଜନ କରିବାକୁ ନିର୍ଦେଶ ଦେଇଥିଲା। ଏଆଇ ୧୭୧ ବିମାନ ଦୁର୍ଘଟଣା ପରେ ଜୁନ୍‌ ୧୬ରେ ପ୍ରାୟ ୧୧୨ ପାଇଲଟ ଅସୁସ୍ଥତା ପାଇଁ ଛୁଟି ନେଇଥିଲେ।
ଏୟାର ଇଣ୍ଡିଆର ସୁରକ୍ଷା ପ୍ରମୁଖ କ୍ୟାପ୍‌ଟେନ ହେନରୀ ଡୋନୋହୋ କ୍ରୁ ସଦସ୍ୟଙ୍କୁ ଦେଇଥିବା ଏକ ଇ-ମେଲ୍‌ରେ ଉଲ୍ଲେଖ କରିଛନ୍ତି ଯେ ଏଆଇର ସୁସ୍ଥତା ଆପ୍‌ ଶାରୀରିକ ଏବଂ ଭାବପ୍ରବଣ ସୁସ୍ଥତା ସହାୟତା ପ୍ରଦାନ କରେ। ଏଥିରେ ବୃତ୍ତିଗତ ପରାମର୍ଶ ଅଧିବେଶନ, ଅନଲାଇନ୍ ଯୋଗ ଶିକ୍ଷା ଆଦି ରହିଛି। ଯଦିଓ ଏହାର ଲକ୍ଷ୍ୟ କ୍ରୁ ସଦସ୍ୟଙ୍କ ମାନସିକ ସୁସ୍ଥତାକୁ ଉନ୍ନତ କରିବା, ତଥାପି ଅନେକ ପାଇଲଟ୍ କହିଛନ୍ତି ଯେ ଏୟାରଲାଇନ୍ସକୁ ଯଦି ଏହା ପ୍ରକୃତରେ ଗମ୍ଭୀର ଲାଗୁଛି ତେବେ କଡ଼ା ପଦକ୍ଷେପ ନେବା ଆବଶ୍ୟକ। ‘ପ୍ରଥମେ, କ୍ରୁ ସଦସ୍ୟଙ୍କୁ ଇମେଲ୍ କରାଯାଉଥିବା ପ୍ରିଣ୍ଟେଡ୍ ରୋଷ୍ଟରଗୁଡ଼ିକୁ (ମୁଦ୍ରିତ କାର୍ଯ୍ୟ ସମୟ) ଫେରିଯିବା ଉଚିତ। କାରଣ ଏହା ସେମାନଙ୍କୁ ସେମାନଙ୍କ ଜୀବନ ଯୋଜନା କରିବାକୁ ଅନୁମତି ଦେଉଥିଲା। ବର୍ତ୍ତମାନ ରୋଷ୍ଟରିଂ (କେବେ କେଉଁ ଉଡ଼ାଣ ପରିଚାଳନା କରିବ) ଏକ ଆପ୍‌ରେ ଅଛି, ଯାହା ନିରନ୍ତର ପରିବର୍ତ୍ତନ ହେଉଛି। ଏହାଦ୍ବାରା ଆମେ ଆମର ଜୀବନ ଯୋଜନା କରିପାରିବୁ ନାହିଁ କାରଣ ଆମେ ନିରନ୍ତର ଏୟାରଲାଇନ୍ସର ନିର୍ଦେଶରେ ରହିଛୁ। ଏହା ତୁରନ୍ତ ପରିବର୍ତ୍ତନ ହେବା ଉଚିତ ବୋଲି ଅନେକ ପାଇଲଟ୍ କହିଛନ୍ତି। ଅହମ୍ମଦାବାଦ ଦୁର୍ଘଟଣା ପରେ ଡିଜିସିଏ ପ୍ରମୁଖ ଏୟାରଲାଇନ୍ସଗୁଡ଼ିକୁ ନିର୍ଦେଶ ଦେଇଥିଲା ଯେ ଯଦି ସେମାନେ ଉଡ଼ାଣ ପରିଚାଳନା କରିବାକୁ ପ୍ରସ୍ତୁତ ନୁହଁନ୍ତି ତେବେ କ୍ରୁ ସଦସ୍ୟଙ୍କୁ କାମକୁ ଆସିବାକୁ ବାଧ୍ୟ କରିବା ଉଚିତ ନୁହେଁ। କାରଣ ମାନସିକ ସ୍ୱାସ୍ଥ୍ୟ ଶାରୀରିକ ସ୍ୱାସ୍ଥ୍ୟକୁ ପ୍ରଭାବିତ କରେ, ଯାହା ସୁରକ୍ଷିତ ଭାବରେ ଉଡ଼ାଣ ପରିଚାଳନା କରିବାର କ୍ଷମତାକୁ ପ୍ରଭାବିତ କରେ।