ଡେସ୍କ: ଆଦର୍ଶ ଆଚରଣ ବିଧି ଉଲ୍ଲଂଘନ ଅଭିଯୋଗରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ନିର୍ବାଚନ ଲଢ଼ିବାରୁ ଅଯୋଗ୍ୟ ଘୋଷଣା କରିବା ପାଇଁ ହୋଇଥିବା ଆବେଦନର ଶୁଣାଣିକୁ ଦିଲ୍ଲୀ ହାଇକୋର୍ଟ ଶୁକ୍ରବାର ଦିନ ସ୍ଥଗିତ ରଖିଛନ୍ତି। ଖଣ୍ଡପୀଠ ଏକାଠି ହୋଇନଥିବାରୁ ଆଜି କୋର୍ଟ ଏହି ମାମଲାର ଶୁଣାଣି କରିନଥିଲେ। ଏପ୍ରିଲ ୨୯ରେ ଏହାର ଶୁଣାଣି ହେବ ନାହିଁ।
ଗତ ସପ୍ତାହରେ ଆନନ୍ଦ ଏସ୍ ଜୋନ୍ଧଲେ ଦାଖଲ କରିଥିବା ଆବେଦନରେ ପ୍ରଧାନମନ୍ତ୍ରୀଙ୍କୁ ୬ ବର୍ଷ ପାଇଁ ନିର୍ବାଚନ ଲଢ଼ିବାକୁ ଅଯୋଗ୍ୟ ଘୋଷଣା କରିବାକୁ ଦାବି କରାଯାଇଥିଲା। ଏଥିରେ କୁହାଯାଇଛି ଯେ ପ୍ରଧାନମନ୍ତ୍ରୀ ଏପ୍ରିଲ ୯ ତାରିଖରେ ପିଲିଭିତରେ ବିଜେପି ପ୍ରାର୍ଥୀ ଜିତିନ ପ୍ରସାଦଙ୍କ ସମର୍ଥନରେ ନିର୍ବାଚନୀ ରାଲିକୁ ସମ୍ବୋଧିତ କରିବା ସମୟରେ ଦଳ ପାଇଁ ଭୋଟ୍ ମାଗିବା ସମୟରେ ହିନ୍ଦୁ ଏବଂ ଶିଖ ଦେବଦେବୀଙ୍କ ବିଷୟରେ କହିଥିଲେ।
ସେ କହିଥିଲେ, ଅଯୋଧ୍ୟାରେ ରାମ ମନ୍ଦିର ନିର୍ମାଣକୁ ବିରୋଧୀ ଦଳମାନେ ସବୁବେଳେ ଘୃଣା କରନ୍ତି। ସେମାନେ ରାମ ମନ୍ଦିରର ପ୍ରାଣ ପ୍ରତିଷ୍ଠା ନିମନ୍ତ୍ରଣକୁ ପ୍ରତ୍ୟାଖ୍ୟାନ କରିବା ସହ ରାମଲଲାଙ୍କୁ ଅପମାନିତ କରିଛନ୍ତି। ଏହି ସମାରୋହରେ ଯୋଗ ଦେଇଥିବା ସେମାନଙ୍କ ଦଳର ଲୋକଙ୍କୁ ୬ ବର୍ଷ ପାଇଁ ଦଳରୁ ନିଲମ୍ବିତ କରାଯାଇଛି।
ପ୍ରଧାନମନ୍ତ୍ରୀ ମୋଦୀ ମଧ୍ୟ ରାଲିରେ କହିଛନ୍ତି ଯେ ଇଣ୍ଡିଆ ମେଣ୍ଟ ‘ଶକ୍ତି’କୁ ଶେଷ କରିବାକୁ ନିଷ୍ପତ୍ତି ନେଇଛି। ଆଜି ସମଗ୍ର ଦେଶରେ ପୂଜା ପାଉଥିବା ‘ଶକ୍ତି’କୁ କଂଗ୍ରେସ ଅସମ୍ମାନ କରିଛି। ଶକ୍ତିଙ୍କ କୌଣସି ଉପାସକ କଂଗ୍ରେସକୁ କେବେ କ୍ଷମା କରିବେ ନାହିଁ ବୋଲି ସେ କହିଥିଲେ।
Comments are closed.