ନୂଆଦିଲ୍ଲୀ : ପ୍ରଧାନ ବିଚାରପତି ରଞ୍ଜନ ଗୋଗଇଙ୍କ ବିରୋଧରେ ଥିବା ଯୌନ ନିର୍ଯାତନା ମାମଲା ସମ୍ବନ୍ଧୀୟ ଖବର ପ୍ରସାରଣ ନେଇ ଗଣମାଧ୍ୟମ ଉପରେ କଟକଣା ଲାଗୁ କରିବା ଲାଗି ହୋଇଥିବା ଏକ ଆବେଦନକୁ ଦିଲ୍ଲୀ ହାଇକୋର୍ଟ ସୋମବାର ଖାରଜ କରିଦେଇଛନ୍ତି। ଏହି ମାମଲା ସର୍ବୋଚ୍ଚ ଅଦାଲତରେ ବିଚାରାଧୀନ ଥିବାରୁ ଉଚ୍ଚ ନ୍ୟାୟାଳୟ ଏଥିରେ ହସ୍ତକ୍ଷେପ କରିବେ ନାହିଁ ବୋଲି ମୁଖ୍ୟ ବିଚାରପତି ରାଜେନ୍ଦ୍ର ମେନନଙ୍କ ପୀଠ କହିଛନ୍ତି। ସ୍ବେଚ୍ଛାସେବୀ ସଂସ୍ଥା ଭାରତୀୟ ଦୁର୍ନୀତି ନିବାରଣ ପରିଷଦ ପକ୍ଷରୁ ଏହି ଆବେଦନ କରାଯାଇଥିଲା। ପ୍ରଧାନ ବିଚାରପତିଙ୍କ ବିରୋଧରେ ତିନି ଜଣିଆ ବିଚାରପତି କମିଟି ତଦନ୍ତ େଶଷ ନ କରିବା ଯାଏ ଏ ସମ୍ବନ୍ଧୀୟ ଖବର ପ୍ରସାରଣ ଉପରେ ତୁରନ୍ତ କଟକଣା ଲାଗୁ କରିବାକୁ ସଂସ୍ଥା ହାଇକୋର୍ଟଙ୍କୁ ନିବେଦନ କରିଥିଲା। ଏଭଳି କରା ନ ଗଲେ ସାଧାରଣ ଲୋକେ ଭାରତୀୟ ବିଚାର ବ୍ୟବସ୍ଥା ଉପରେ ଆସ୍ଥା ହରାଇବେ ଏବଂ ଦେଶର ବୃହତ କ୍ଷତି ହେବ ଯାହାର ଭରଣା କରିବା କଷ୍ଟକର ହେବ ବୋଲି ସଂସ୍ଥା ଦର୍ଶାଇଥିଲା। ପ୍ରଧାନ ବିଚାରପତିଙ୍କ ବିରୋଧରେ ଅଣାଯାଇଥିବା ଏହି ଅଭିଯୋଗ ପଛରେ କେତେକ ଦେଶଦ୍ରୋହୀଙ୍କ ସମ୍ପୃକ୍ତି ଥିବା ନେଇ ସଂସ୍ଥା ସନ୍ଦେହ ବ୍ୟକ୍ତ କରିଛି। ତଦନ୍ତ ହୋଇ ନ ଥିବା ଏହି ମାମଲା ସମ୍ବନ୍ଧରେ ଖବର ପ୍ରକାଶ କରିଥିବା ଗଣାମଧ୍ୟମଗୁଡିକ ବିରୋଧରେ କାର୍ଯ୍ୟାନୁଷ୍ଠାନ ଲାଗି ମଧ୍ୟ ଆବେଦନରେ ଉଲ୍ଲେଖ କରାଯାଇଛି। ଆବେଦନରେ ଯୁକ୍ତି ଦର୍ଶାଯାଇଛି ଯେ, ଅଭିଯୋଗ ସମ୍ବନ୍ଧରେ ଖବର ପ୍ରକାଶନ ଯୋଗୁ ସିଧାସଳଖ ଭାବେ ଭାରତୀୟ ବିଚାର ବିଭାଗୀୟ ବ୍ୟବସ୍ଥା ଉପରେ ଆଞ୍ଚ ଆସିଛି। ପ୍ରଧାନ ବିଚାରପତିଙ୍କ କାର୍ଯ୍ୟାଳୟରେ ନିଯୁକ୍ତ ଜଣେ ପୂର୍ବତନ କର୍ମଚାରୀଙ୍କ ମିଥ୍ୟା ସତ୍ୟପାଠକୁ ଭିତ୍ତି କରି ପ୍ରଧାନବିଚାରପତିଙ୍କ ବିରୋଧରେ ଅଭିଯୋଗ ଅଣାଯାଇପାରିବ ନାହିଁ। ଯେ ପର୍ଯ୍ୟନ୍ତ ଅଭିଯୋଗ ପ୍ରମାଣ ନ ହୋଇଛି ସେପର୍ଯ୍ୟନ୍ତ ଏସମ୍ବନ୍ଧୀୟ ଖବର ପ୍ରସାରଣ ବନ୍ଦ ହେବା ଉଚିତ।
Popular Categories
Previous article
Next article