ମହାନଦୀର ବନ୍ୟାରେ ଶହ ଶହ ଏକର ପନିପରିବା ଓ ଧାନ ଫସଲ ଉଜୁଡିଲା
ତୁରନ୍ତ ଆକଳନ କରି କ୍ଷତିପୂରଣ ଦାବି
![](https://samajalive.in/wp-content/uploads/2022/08/Damaged-Crop-by-Mahanadi-Flood-a.jpg)
ଗୁରୁଡିଝାଟିଆ : ମହାନଦୀର ବନ୍ୟାରେ ଶହ ଶହ ଏକର କୃଷି କ୍ଷେତ୍ର ସଂପୂର୍ଣ୍ଣ ଜଳମଗ୍ନ ହୋଇଛି । ୬ଦିନ ବିତିଯାଇଥିଲେ ମଧ୍ୟ ଧାନ ଓ ପରିବା କ୍ଷେତ ଉପରୁ ସଂପୂର୍ଣ୍ଣ ପାଣି ଯାଇନାହିଁ । ସଂପୂର୍ଣ୍ଣ ପାଣି ଶୁଖିବା ପାଇଁ ୪ ରୁ ୫ ଦିନ ଲାଗିବ। ଚାଷୀ ଏବେ ମୁଣ୍ଡରେ ହାତଦେଇ ବସିଛି । ବର୍ଷକର ଆହାର ବନ୍ୟା ଛଡାଇ ନେଇଛି। କିଭଳି ପରିବାର ଚଳାଇବ । ପନିପରିବା ଚାଷ ପାଇଁ ଆଠଗଡ ରାଜ୍ୟରେ ଏକ ସ୍ୱତନ୍ତ୍ର ନାମ କରିଛି । ଧୁରୁଷିଆ, ଅନନ୍ତପୁର, କଟକିଆ ସାହି, ମହାକାଳବସ୍ତ, ଘଣ୍ଟିଖାଲ, ମଞ୍ଚେଶ୍ୱର ଓ ଟାଙ୍ଗି-ଚୌଦ୍ୱାର ବ୍ଲକର କଖଡି ପଞ୍ଚାୟର ଶହଶହ ଏକର ଧାନ ଓ ପରିବା କ୍ଷେତ ସଂପୂର୍ଣ୍ଣ ଉଜୁଡି ଯାଇଛି। ଧାନ ବେଉଷଣ ପରେ ବଛା ସରିଯାଇଥିଲା। ସ୍ୱଳ୍ପ ମିଆଦି ଧାନ ମଧ୍ୟ ଥୋର ଆସିଯାଇଥିଲା। ହେଲେ ବନ୍ୟାଜଳ ସବୁ ଉଜାଡି ଦେଇଛି। ସବୁଜ ପନିପରିବା ବିଶେଷତଃ ଅନନ୍ତପୁର, ଧୁରୁଷିଆ, ମହାକାଳବସ୍ତ, ଘଣ୍ଟିଖାଲ ଓ ମଞ୍ଚେଶ୍ୱର ପଞ୍ଚାୟତରେ ଅଧିକ ଚାଷ କରାଯାଇଥାଏ। ତତ୍ ସହିତ କଖଡିର ଚାଷୀମାନେ ମଧ୍ୟ ପରିବା ଚାଷ କରିଥାନ୍ତି। ଲଗାଯାଇଥିବା ବାଇଗଣ, ରଞ୍ଜାରେ ମାଡିଥିବା ବୋଦି, ଝୁଡଙ୍ଗ, ପୋଟଳ, କଲରା, ଜହ୍ନି ଓ କାକୁଡି ସାଙ୍ଗକୁ ଲଗାଇଯାଇଥିବା ବାଇଗଣ, ଭେଣ୍ଡି ଓ କଖାରୁ ମଧ୍ୟ ବେଶ ଅମଳ ଅବସ୍ଥାରେ ଥିଲା। ସବୁ ବନ୍ୟାଜଳରେ ସଢି ନଷ୍ଟ ହୋଇଯାଇଛି । କୃଷକ କରଜ କରି ଲଗାଇଥିବା ଫସଲ ବନ୍ୟାରେ ଉଜୁଡି ଯାଇଥିବାରୁ ସୁଝିବ କିପରି ? ରାଜ୍ୟ ସରକାର ତୁରନ୍ତ କ୍ଷୟକ୍ଷତି ଆକଳନ କରି ସହାୟତା ପ୍ରଦାନ କରିବା ସହିତ ସ୍ୱଳ୍ପ ମିଆଦି ଚାଷ ପାଇଁ ବିହନ ଓ ବିନାସୁଧରେ ଋଣ ଯୋଗାଇଦେବା ନିମନ୍ତେ କୃଷକମାନେ ଦାବି କରିଛନ୍ତି ।
Comments are closed.