ଦେଶରେ ପୁଣି ‘ଡି’ ଆତଙ୍କ; ଅଧିକ ଘାତକ ହେଉଛି ଡେଙ୍ଗୁର ଡି୨ ପ୍ରକରଣ

ନୂଆଦିଲ୍ଲୀ: କରୋନା ମହାମାରୀର ଭୂତାଣୁ ନିଜର ରୂପ ବଦଳାଇବା ସହିତ ଏହାର ଡେଲଟା (ଡି) ପ୍ରକରଣ ସମଗ୍ର ବିଶ୍ୱବାସୀଙ୍କ ପାଇଁ ଘାତକ ସାବ୍ୟସ୍ତ ହେଉଥିବାବେଳେ ଏବେ ଭାରତରେ ଆଉ ଏକ ‘ଡି’ ଆତଙ୍କ ଦେଖାଦେଇଛି । ଡେଙ୍ଗୁର ନୂଆ ଡି୨ ପ୍ରକରଣ ଅଧିକ ଘାତକ ବୋଲି ଜଣାଯାଇଛି । ଡେଙ୍ଗୁର ଡିଇଏନଭି ୨ ପ୍ରକରଣ ଦେଶରେ ଡେଙ୍ଗୁ ରୋଗୀ ସଂଖ୍ୟା ବୃଦ୍ଧିର ମୂଳ କାରଣ ବୋଲି ଜାଣିବାକୁ ମିଳିଛି । ପ୍ରାୟ ପନ୍ଦର ଦିନ ତଳେ ଭାରତର ଚିକିତ୍ସା ଗବେଷଣା ପରିଷଦ (ଆଇସିଏମଆର)ର ମହାନିର୍ଦ୍ଦେଶକ ଡା.ବଳରାମ ଭାର୍ଗବ ନିଶ୍ଚିତ କରାଇଦେଇ କହିଥିଲେ ଯେ ଦେଶରେ ଡେଙ୍ଗୁ ରୋଗୀଙ୍କ ସଂଖ୍ୟା ଦ୍ରୁତ ବୃୃଦ୍ଧି ପଛରେ ଏହି ପ୍ରକରଣ ଦାୟୀ । ସଂପ୍ରତି ଉତ୍ତର ପ୍ରଦେଶର ଫିରୋଜାବାଦ, ଆଗ୍ରା, ମଥୁରା ଏବଂ ଆଲିଗଡ ଆଦି ସ୍ଥାନରେ ଡେଙ୍ଗୁ ରୋଗୀଙ୍କ ସଂଖ୍ୟା ବହୁଗୁଣ ବୃଦ୍ଧିପାଇଛି । ଅଗଷ୍ଟ ଶେଷରୁ ସେପ୍ଟେମ୍ବର ମଝି ପର୍ଯ୍ୟନ୍ତ ଅନ୍ୟୂନ ୫୮ ଜଣ ଲୋକ କେବଳ ଫିରୋଜାବାଦରେ ଡେଙ୍ଗୁ ରୋଗରେ ପ୍ରାଣ ହରାଇଛନ୍ତି । ଏହି ଡି୨ ପ୍ରକରଣ ଅଧିକ ଘାତକ ହୋଇଛି ଏବଂ ଏଥିରେ ପ୍ରାଣନାଶକ ମସ୍ତିଷ୍କରେ ପ୍ରଦାହକାରୀ ଜ୍ୱର ହେବା ସହିତ ଶରୀରରେ ଅନ୍ୟାନ୍ୟ ମାରାତ୍ମକ ଲକ୍ଷଣମାନେ ପ୍ରକାଶ ପାଉଛି ।