ବାତ୍ୟା ଅସନି ପ୍ରଭାବ: ଆଣ୍ଡାମାନର ବିଭିନ୍ନ ଅଞ୍ଚଳରେ ପ୍ରବଳ ବର୍ଷା, ଏବେ ଅବପାତ ନେଉଛି ବାତ୍ୟାର ରୂପ

ନୂଆଦିଲ୍ଲୀ – ଆଣ୍ଡାମାନ ଉପରେ ସୃଷ୍ଟ ଲଘୁଚାପ କ୍ଷେତ୍ର ଅଧିକ ଘନୀଭୀତ ହେବା ସହ ଗଭୀର ଅବପାତର ରୂପ ଧାରଣ କରିଛି । ଏହାର ପ୍ରଭାବରେ ଆଣ୍ଡାମାନରେ ପ୍ରବଳରୁ ଅତି ପ୍ରବଳ ବର୍ଷା ହୋଇଥିବା ସୂଚନା ମିଳିଛି । ଧୀରେ ଧୀରେ ଏହା ଘନୀଭୂତ ହେବା ସହ ସୋମବାର ରାତି ସୁଦ୍ଧା ଏହା ବାତ୍ୟା (CYCLONE) ର ରୂପ ଧାରଣ କରିବ ବୋଲି ଭାରତୀୟ ପାଣିପାଗ ବିଭାଗ ପକ୍ଷରୁ ସୂଚନା ଦିଆଯାଇଛି ।

ଆଣ୍ଡାମାନ ଏବଂ ଏହାର ନିକଟବର୍ତ୍ତୀ ଅଞ୍ଚଳରେ ଲଘୁଚାପ କ୍ଷେତ୍ର ସୃଷ୍ଟି ହୋଇଥିଲା । ଏହାର ପାରିପାର୍ଶ୍ୱିକ ଅବସ୍ଥା ଅଧିକ ଘନୀଭୂତ କରିବା ପାଇଁ ସହାୟତା କରିଥିଲା । ପରେ ଏହା ଗଭୀର ଅବପାତରେ ପରିଣତ ହେବା ସହ ଦ୍ୱୀପ ପୁଞ୍ଜରେ ପ୍ରବଳରୁ ଅତି ପ୍ରବଳ ବର୍ଷା ହୋଇଥିଲା।

ଏହି ବାତ୍ୟ ଆଣ୍ଡାମାନ ଉପରେ ମିଆଁମାର ଆଡକୁ ଗତି କରିବ ବୋଲି ଭାରତୀୟ ପାଣିପାଗ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି । ଏହା ମିଆଁମାର ଏବଂ ଦକ୍ଷିଣ ବାଂଲାଦେଶ ନିକଟରେ ସ୍ଥଳଭାଗ ସ୍ପର୍ଶ କରିପାରେ । ଏହାର ପ୍ରଭାବରେ ମିଆଁମାର ଏବଂ ବାଂଲାଦେଶରେ ପ୍ରବଳ ବର୍ଷାର ସମ୍ଭାବନା ରହିଛି । ୨୩ ତାରିଖ ସକାଳେ ଏହା ସ୍ଥଳଭାଗ ଅତିକ୍ରମ କରିବାର ସମ୍ଭାବନା ରହିଛି ।