ସମାଜ ପୋର୍ଟାଲ ଡେସ୍କ : କରୋନା ପାଇଁ ସମଗ୍ର ଦେଶ ଲକ୍ ଡାଉନ୍ ହୋଇ ରହିଛି । ଏହାରି ମଧ୍ୟରେ ବିଭିନ୍ନ ରାଜ୍ୟରେ ଫଶି ରହିଛନ୍ତି ହଜାର ହଜାର ପ୍ରବାସୀ ଶ୍ରମିକ । ପ୍ରବାସୀ ଶ୍ରମିକମାନଙ୍କୁ ଫେରାଇ ଆଣିବା ପାଇଁ ରାଜ୍ୟ ସରକାର ଆରମ୍ଭ କରିଛନ୍ତି ପଞ୍ଜିକରଣ । ବାହାର ରାଜ୍ୟରୁ ଆସିବାକୁ ଥିବା ସମସ୍ତ ପ୍ରବାସୀ ଓଡିଆ ଶ୍ରମିକଙ୍କ ପାଇଁ ପଞ୍ଜିକରଣକୁ ବାଧ୍ୟତାମୂଳକ କରିଛନ୍ତି ରାଜ୍ୟ ସରକାର । ଏହାରି ମଧ୍ୟରେ ରାଜ୍ୟ ସରକାରଙ୍କ ପଞ୍ଜିକରଣ ବାଧ୍ୟତାମୂଳକ ଏବଂ ଲକ୍ ଡାଉନ ସମୟରେ ଓଡିଶା ଫେରିବାକୁ ବ୍ୟାକୁଳ ଥିବା ଶ୍ରମିକମାନଙ୍କୁ ଠକିବା ଆରମ୍ଭ କରିଦେଇଛନ୍ତି ସାଇବର ଅପରାଧୀ ।
ରାଜ୍ୟ ସରକାର ପ୍ରବାସୀ ଶ୍ରମିକମାନଙ୍କ ପଞ୍ଜିକରଣ ପାଇଁ କରିଥିବା ୱେବସାଇଟରେ ନିଜେ ଶ୍ରମିକ କିମ୍ବା ତାଙ୍କର କେହି ସମ୍ପର୍କୀୟ ରେଜିଷ୍ଟ୍ରେସନ କରୁଥିବା ସହ ପ୍ରବାସୀ ଶ୍ରମିକଙ୍କ ପଞ୍ଚାୟତରେ ମଧ୍ୟ ପଞ୍ଜିକରଣ କରାଯାଇଛି । କିନ୍ତୁ ଏହାରି ମଧ୍ୟରେ ଓଡିଶା ଫେରିବାକୁ ବ୍ୟାକୁଳ ଥିବା ପ୍ରବାସୀ ଶ୍ରମିକଙ୍କ ବ୍ୟାକୁଳତାର ଫାଇଦା ଉଠାଉଛନ୍ତି ସାଇବର ଠକ । ସାଇବର ଠକ ମାନେ ନିଜକୁ ରାଜ୍ୟ ସରକାରଙ୍କ କୋଭିଡ-୧୯ ସେଲର କର୍ମଚାରୀ କହି ଶ୍ରମିକମାନଙ୍କୁ ଫୋନ କରିବା ସହ କେଉଁ ରାଜ୍ୟର କେଉଁ ସହରରେ ଆଦି ତଥ୍ୟ ପଚାରି ବଶ୍ଵସନୀୟତା ଦେଖାଉଛନ୍ତି । ଏହାପରେ ପ୍ରବାସୀ ଶ୍ରମିକଙ୍କ ମୋବାଇଲକୁ ଓ.ଟି.ପି ପଠାଉଛନ୍ତି । ରେଜିଷ୍ଟ୍ରେସନ ପାଇଁ ଓ.ଟି.ପି ଆବଶ୍ୟକଥିବା କହି ଶ୍ରମିକମାନଙ୍କ ମୋବାଇଲକୁ ଯାଇଥିବା ଓ.ଟି.ପି ସଂଗ୍ରହ କରୁଛନ୍ତି । ଏହାପରେ ପ୍ରବାସୀ ଶ୍ରମିକଙ୍କ ଆକାଉଣ୍ଟରୁ ଟଙ୍କା ଗାଏବ । ରାଜ୍ୟ ବାହାରେ କାମକରୁଥିବା ପ୍ରବାସୀ ଶ୍ରମିକମାନେ ଓଡିଶା ଫେରିବାକୁ ବ୍ୟାକୁଳ ଥିବା ସମୟରେ ସାଇବର ଠକଙ୍କ ଚାଲକୁ ବୁଝି ନପାରି ରାଜ୍ୟ ସରକାରଙ୍କ ଦ୍ବାରା ଆରମ୍ଭ କରାଯାଇଥିବା ପଞ୍ଜିକରଣ ବୋଲି ଭାବି ଠକାମୀର ଶିକାର ହେଉଥିବା ଜଣାପଡିଛି।
