କଟକ: ତୁଳସୀପୁର ମଠାସାହିର ଦୁଇ ଭଉଣୀ ହେଉଛନ୍ତି ସୀମା ଓ ଲିଜା । ଚଳିତ ବର୍ଷ ଉଭୟ ମାଟ୍ରିକ ପାସ କରିଥିଲେ। କିନ୍ତୁ ଘରର ଆର୍ଥିକ ଅବସ୍ଥା ସ୍ୱଚ୍ଛଳ ନଥିବାରୁ +୨ରେ ସେମାନେ ନାମ ଲେଖାଇବା ପାଇଁ ସମର୍ଥ ହୋଇନଥିଲେ। ଝିଅ ଦୁଇଜଣ ସୀମା ଓ ଲିଜାଙ୍କର ବାପା ଦୁଇ ବର୍ଷ ତଳେ କର୍କଟ ରୋଗରେ ମୃତ୍ୟୁବରଣ କରିଥିଲେ। ମା’ ମଧ୍ୟ ଜରାୟୁ କର୍କଟରେ ଆକ୍ରାନ୍ତ ହୋଇ ଚିକିତ୍ସିତ ହେଉଛନ୍ତି। ଘରର ଆର୍ଥିକ ଅବସ୍ଥା ନକହିଲେ ଭଲ। ଏହି ସମୟରେ ଗୁଡଗାଁଓ ଠାରେ ଅବସ୍ଥାପିତ ଆଇଟି ଇଂଜିନିୟର ସନ୍ଦୀପ ବଳ ସେମାନଙ୍କୁ ସାହାଯ୍ୟର ହାତ ବଢ଼ାଇଛନ୍ତି।
ଖବର ପାଇବା ପରେ ସେ ଦୁଇ ଭଉଣୀ ସୀମା ଓ ଲିଜାଙ୍କର +୨ ଶ୍ରେଣୀରେ ନାମ ଲେଖାଇବା ପାଇଁ ଆବଶ୍ୟକ ଅର୍ଥ ପ୍ରଦାନ କରିଛନ୍ତି। ଦୁଇ ଭଉଣୀଙ୍କ ମଧ୍ୟରୁ ଜଣଙ୍କର ଇମର୍ତ୍ତି ଦେବୀ ମହିଳା ମହାବିଦ୍ୟାଳୟରେ ନାମ ଲେଖାଯାଇଥିବା ବେଳେ ଅନ୍ୟ ଜଣେ ଭଉଣୀ ବୀରେନ ମିତ୍ର ମହିଳା ମହାବିଦ୍ୟାଳୟରେ ନାମ ଲେଖାଇବା ସମ୍ଭବ ହୋଇଛି। ଦୁଇ ଜଣଙ୍କ ପାଠପଢ଼ା ସମ୍ଭବ ହୋଇଥିବାରୁ ସନ୍ଦୀପଙ୍କୁ ଅନ୍ତରରୁ ଧନ୍ୟବାଦ ଜଣାଇଛନ୍ତି ସୀମା, ଲିଜା ଓ ସେମାନଙ୍କର ମାଆ।
