ଗୁରୁଡିଝାଟିଆ : କ୍ଷୀର ଅପମିଶ୍ରଣ କରୁଥିବା ରାକେଟର ପର୍ଦ୍ଦାଫାସ କରିଛି ପୁଲିସ୍। ଶନିବାର କଟକ ଗୁରୁଡିଝାଟିଆ ଅଞ୍ଚଳରେ କ୍ଷୀର ମିଶ୍ରଣ କାର୍ଯ୍ୟର ମାଷ୍ଟର ମାଇଣ୍ଡ ଏବଂ ଜଣେ ସହଯୋଗୀଙ୍କୁ ପୁଲିସ୍ ଗିରଫ କରିବାରେ ସଫଳ ହୋଇଛି। ସୂଚନା ଅନୁସାରେ ସେପ୍ଟେମ୍ବର ୧୦ ତାରିଖରେ ଗୁରୁଡିଝାଟିଆ ଥାନା କୁଷ୍ପଙ୍ଗୀ ନିକଟରେ କ୍ଷୀର ଅପମିଶ୍ରଣ କରାଯାଉଥିବା ଖବର ପାଇ ପୁଲିସ୍ ଚଢାଉ କରିଥିଲା। ସେଠାରୁ ଅପମିଶ୍ରଣ କରୁଥିବା କ୍ଷୀର ବୋଝେଇ ଟ୍ୟାଙ୍କର ଓ ଏକ ଟାଟା ଏସି ଗାଡ଼ିରେ ବୋଝେଇ ହୋଇଥିବା ୫ଟି କ୍ଷୀର ଓ ରାସାୟନିକ ପଦାର୍ଥ ମିଶା ପାଣି ଜାରକୁ ଜବତ କରି ଥାନାକୁ ଆଣିଥିଲା। କ୍ଷୀରରେ ଅପମିଶ୍ରିତ ହେଉଥିବା ଲୁଣ,ପାଣି ,ପାଉଡର ଓ ରାସାୟନିକ ପଦାର୍ଥ ମିଶା ପାଣିକୁ ମଧ୍ୟ ଜବତ କରିଥିଲା । ଏବଂ ଉକ୍ତ ଜବତ ପଦାର୍ଥକୁ ପରୀକ୍ଷା ପାଇଁ ପରୀକ୍ଷାଗାରକୁ ପ୍ରେରଣ କରିଥିଲା । ତେବେ ଅପମିଶ୍ରଣକାରୀ ଅଭିଯୁକ୍ତ ଓ କ୍ଷୀର ବୋଝେଇ ଟ୍ୟାଙ୍କର ଡ଼୍ରାଇଭର ଘଟଣାସ୍ଥଳରୁ ଫେରାର୍ ହୋଇଯାଇଥିବାବେଳେ ପୁଲିସ୍ ମାଷ୍ଟର ମାଇଣ୍ଡ ଏବଂ ସହଯୋଗୀକୁ ଗିରଫ କରିଛି।
