ଖୋଲିବ ୨୪ ଘଣ୍ଟିଆ ସହାୟକ ଡେସ୍କ
ଭୁବନେଶ୍ୱର: ଏଣିକି କରୋନା ଆକ୍ରାନ୍ତଙ୍କ ଚିକିତ୍ସା ସମ୍ପର୍କରେ କୌଣସି ସରକାରୀ ଓ ଘରୋଇ କୋଭିଡ ଡାକ୍ତରଖାନା ତଥ୍ୟ ଲୁଚାଇ ପାରିବେ ନାହିଁ। ଆକ୍ରାନ୍ତ ପରିବାର ସଦସ୍ୟଙ୍କୁ ନିୟମିତ ବ୍ୟବଧାନରେ ଟିକିନିଖି ତଥ୍ୟ ଦେବେ। ଯଦି ଏଥିରେ କୌଣସି ସରକାରୀ ଓ ଘରୋଇ କୋଭିଡ ଡାକ୍ତରଖାନା କର୍ତ୍ତୃପକ୍ଷ ଅବହେଳା କରନ୍ତି ତେବେ ତାଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର ଦର୍ଶାଇଛନ୍ତି। ଏ ସଂକ୍ରାନ୍ତରେ ସରକାରଙ୍କ ନିକଟରେ ଅଭିଯୋଗ ଲମ୍ବିବା ପରେ ବିଭାଗ ପକ୍ଷରୁ ଏହି କଡ଼ା ପଦକ୍ଷେପ ଗ୍ରହଣ କରାଯାଇଛି।
ସମସ୍ତ ଘରୋଇ ଓ ସରକାରୀ କୋଭିଡ୍ ହସ୍ପିଟାଲ ଓ କେୟାର ସେଣ୍ଟର ନିକଟରେ ସିସିଟଭି କ୍ୟାମେରା ଓ ଟିଭି ସଂଯୁକ୍ତ କରି ରୋଗୀଙ୍କ ସହ ସେମାନଙ୍କ ସମ୍ପର୍କୀୟଙ୍କୁ କଥାବାର୍ତ୍ତା କରାଯିବା ସୁବିଧା ପ୍ରଦାନ କରାଯିବ। ହ୍ବାଟସ୍ଆପ ମାଧ୍ୟମରେ ସମ୍ପର୍କୀୟଙ୍କୁ ଭଏସ୍ ମେସେଜ୍ / ଫଟୋ ପ୍ରଦାନ କରିବା ପାଇଁ ମଧ୍ୟ ସୁବିଧା ପ୍ରଦାନ କରାଯିବ। pic.twitter.com/VCZ68UY7pq
— I & PR Department, Odisha (@IPR_Odisha) May 16, 2021
ଏଣିକି ପ୍ରତ୍ୟେକ ସରକାରୀ ଓ ଘରୋଇ ଡାକ୍ତରଖାନାରେ କରୋନା ଆକ୍ରାନ୍ତଙ୍କ ଚିକିତ୍ସା ସମ୍ପର୍କରେ ପରିବାର ଲୋକଙ୍କୁ ଜଣାଇବା ପାଇଁ ୨୪ ଘଣ୍ଟିଆ ସହାୟକ ଡେସ୍କ ଖୋଲିବା ବାଧ୍ୟତାମୂଳକ କରାଯାଇଛି। କର୍ତ୍ତୃପକ୍ଷ ତୁରନ୍ତ ଫୋନ୍ କିମ୍ବା ଟୋଲ୍ ଫ୍ରି ନମ୍ବର ପ୍ରଚଳନ କରିବେ। ସଂକ୍ରମିତ ପରିବାର ବର୍ଗଙ୍କ ନିମନ୍ତେ ଏହାକୁ ବ୍ୟାପକ ଭାବେ ପ୍ରସାର କରାଯିବ। ସାମାଜିକ ଗଣମାଧ୍ୟମ ଜରିଆରେ ଉଭୟ ନମ୍ବରକୁ ପ୍ରସାର କରାଯାଇ ପାରିବ। ସହାୟକ ଡେସ୍କରେ ବସିଥିବା ବ୍ୟକ୍ତି ପ୍ରତି ଫୋନ୍କୁ ଖାତାରେ ପଞ୍ଜୀକୃତ କରି ରଖିବେ। ହ୍ୱାଟ୍ସ ଆପ୍ ଓ ଏସ୍ଏମ୍ଏସ୍ ଜରିଆରେ ସୂଚନା ଦେବେ ବୋଲି ନିର୍ଦେଶନାମାରେ ଉଲ୍ଲେଖ କରାଯାଇଛି।
