ଚୌଦ୍ୱାର: ଘରେ ପଶି ବିଭିନ୍ନ ସାମଗ୍ରୀ ଚୋରି କରୁଥିବା ୬ଜଣ ଚୋରଙ୍କୁ ଚୌଦ୍ୱାର ପୁଲିସ ଗିରଫ କରିବା ସହିତ ସେମାନଙ୍କ ନିକଟରୁ ବହୁ ମାତ୍ରାରେ ଚୋରି ସାମଗ୍ରୀ ଜବତ କରିଛି । ଗିରଫ ଅଭିଯୁକ୍ତ ମାନେ ହେଲେ ଚୌଦ୍ୱାର ଥାନା ଅନ୍ତର୍ଗତ ବଡ଼ସାମନ୍ତରାପୁର ଗ୍ରାମର ମୁକେଶ ବସ୍ତିଆ(୨୮), ଅଲେଖ ବସ୍ତିଆ(୨୧), ଗଣେଶ୍ୱର ସାହୁ(୨୬), ଦୁଷ୍ମନ୍ତ ସାହୁ(୧୯), ଅଶୋକ କୁମାର ସାହୁ(୨୭) ଓ ସୌମ୍ୟ ରଞ୍ଜନ ପ୍ରଧାନ(୨୫) । ସେମାନଙ୍କ ନିକଟରୁ ଗୋଟିଏ ଫ୍ରିଜ୍, ଗୋଟିଏ ଏସି , ଗୋଟିଏ ଟିଭି, ଗୋଟିଏ ଷ୍ଟାଣ୍ଡ ଫ୍ୟାନ୍ ଓ ଗୋଟିଏ ପାଣିପମ୍ପ ଜବତ କରାଯାଇଛି ।
ପୁଲିସ ସୂଚନା ଅନୁଯାୟୀ ବଡ଼ ସାମନ୍ତରାପୁର ପ୍ରଧାନ ସାହିର ନିରୂପମା ସାହୁ ରବିବାର ଦିନ ଥାନାରେ ଅଭିଯୋଗ କରିଥିଲେ ଯେ, ସେ ଓ ତାଙ୍କ ପରିବାର ଲୋକେ ୨୭ ତାରିଖ ରାତିରେ ଘରେ ନଥିବାବେଳେ ଦୁର୍ବୃତ୍ତମାନେ ତାଙ୍କ ଘର ତାଲାଭାଙ୍ଗି ଘର ଭିତରେ ପଶି ଗୋଟିଏ ଏଲଜି ରେଫ୍ରିଜେରେଟର ଓ ଗୋଟିଏ ପଂଖା ଚୋରେଇ ନେଇଛନ୍ତି । ସେହି ରାତିରେ ପ୍ରତାପ ରାଉତ ଓ ମନୋରମା ରାଉତଙ୍କ ଘରୁ ମଧ୍ୟ ଗୋଟିଏ ଟିଭି ଓ ଗୋଟିଏ ପାଣିପମ୍ପ ଚୋରି ହୋଇଥିବା ପୁଲିସକୁ ଖବରମିଳିଥିଲା । ଏସ୍ଆଇ ମାନସ କୁମାର ମହାରଣାଙ୍କ ନେତୃତ୍ୱରେ ପୁଲିସର ଏକ ଦଳ ବିଭିନ୍ନ ସୁତ୍ରରୁ ଖବର ସଂଗ୍ରହ କରିବା ସହିତ ବିଭିନ୍ନ ସ୍ଥାନରେ ଚଢ଼ଉ କରି ୬ଜଣ ଯାକ ଅଭିଯୁକ୍ତଙ୍କୁ ଧରିବାରେ ସକ୍ଷମ ହୋଇଥିଲେ । ଅଭିଯୁକ୍ତ ମାନଙ୍କୁ ଅଦାଲତ ଚାଲାଣ କରାଯାଇଛି ।
