ଚୌଦ୍ୱାର : ଚୌଦ୍ୱାର ନିକଟ ୫୫ନଂ ଜାତୀୟ ରାଜପଥ ଧୂମାବତୀ ଛକରେ ବୁଧବାର ଏକ ସଡକ ଦୁର୍ଘଟଣାରେ ଜଣେ ମହିଳାଙ୍କର ଶୋଚନୀୟ ମୃତ୍ୟୁ ଘଟିଛି। ମୃତକ ଜଣକ ହେଲେ ଚୌଦ୍ୱାର ନିକଟ ଗୌସନଗରର ପ୍ରିୟଙ୍କା ସ୍ୱାଇଁ(୪୫)। ସୂଚନାରୁ ପ୍ରକାଶଯେ ପ୍ରିୟଙ୍କାଙ୍କ ଭାଇ ଚଣ୍ଡିଖୋଲ ଅଂଚଳର ନାରଣ ମାଝୀ ଅଷ୍ଟମୀ ଉପଲକ୍ଷେ ଭଉଣୀ ଘରକୁ ଆସିଥିଲେ। ସଂନ୍ଧ୍ୟା ପ୍ରାୟ ୫ଟା ବେଳେ ନାରଣ ଓ ପ୍ରିୟଙ୍କା ଏକ ବାଇକରେ ଘରକୁ ଫେରୁଥିବା ବେଳେ ଧୁମାବତୀ ଛକରେ ପଛରୁ ଏକ ଟ୍ରକ ବାଇକକୁ ଧକ୍କା ଦେବା ଫଳରେ ଉଭୟ ବାଇକରୁ ଖସି ପଡିଥିଲେ। ଫଳରେ ଟ୍ରକର ପଛ ଚକା ପ୍ରିୟଙ୍କାଙ୍କ ଉପରେ ଚଢି ଯାଇଥିଲା। ଘଟଣାସ୍ଥଳରେ ପ୍ରିୟଙ୍କାଙ୍କ ମୃତ୍ୟୁ ହୋଇଥିବା ବେଳେ ନାରଣ ଗୁରୁତର ଆହତ ହୋଇଥିଲେ। ଚୌଦ୍ୱାର ପୁଲିସ ଘଟଣାସ୍ଥଳରେ ପହଞ୍ଚି ଆହତଙ୍କୁ ୧୦୮ ଆମ୍ବୁଲାନ୍ସ ଯୋଗେ କଟକ ବଡ ଡାକ୍ତରଖାନା ପଠାଇବା ସହିତ ପ୍ରିୟଙ୍କାଙ୍କ ଶବ ବ୍ୟବଚ୍ଛେଦ ପାଇଁ ପଠାଇଥିଲେ। ଏହି ଦୁର୍ଘଟଣାକୁ ନେଇ ସ୍ଥାନୀୟ ଲୋକଙ୍କ ଭିତରେ ତୀବ୍ର ଉତ୍ତୋଜନା ଦେଖା ଦେଇଥିଲା। ଜାତୀୟ ରାଜପଥ ସଂପ୍ରସାରଣ କାର୍ଯ୍ୟ ଚାଲିଥିବାରୁ ସ୍ଥାନୀୟ ପୁଲିସ ଓ ପ୍ରଶାସନ ଭାରିଯାନ ଚଳାଚଳ ଉପରେ କୌଣସି ଅଂକୁଶ ଲଗାଉନଥିବା ହେତୁ ଚୌଦ୍ୱାର ଭିତରେ ରାଜରାସ୍ତାରେ ବାରମ୍ବାର ଦୁର୍ଘଟଣା ଘଟୁଥିବା ଅଭିଯୋଗ କରି ତୁରନ୍ତ ପ୍ରଶାସନ ଚୌଦ୍ୱାର ସହରର ବିଭିନ୍ନ ଛକ ଯାଗା ମାନଙ୍କରେ ଭାରିଯାନ ଚଳାଚଳକୁ ନିୟନ୍ତ୍ରଣ କରିବାକୁ ଲୋକେ ଦାବି କରିଛନ୍ତି ।
Popular Categories
Previous article
Next article