ନୂଆଦିଲ୍ଲୀ: ଦେଶରେ ୧୫ରୁ ୧୮ବର୍ଷର କିଶୋର, କିଶୋରୀଙ୍କୁ ଟିକାକରଣ କରିବା ନେଇ କେନ୍ଦ୍ର ସରକାର ନେଇଥିବା ନିଷ୍ପତ୍ତିକୁ ଏମ୍ସର ବରିଷ୍ଠ ମହାମାରୀ ରୋଗ ବିଶେଷଜ୍ଞ ଡାକ୍ତର ସଞ୍ଜୟ କୁମାର ରାୟ ନପସନ୍ଦ କରିଛନ୍ତି। ସେ କହିଛନ୍ତି ଯେ କିଶୋରକୁ ଟିକାକରଣ ବିଜ୍ଞାନ ସମ୍ମତ ନୁହେଁ। କରୋନାର କୋଭାକ୍ସିନ ଟିକାକୁ ବୟସ୍କ ଓ ଶିଶୁଙ୍କଠାରେ ପରୀକ୍ଷା କରାଯିବା ସମୟରେ ଡାକ୍ତର ରାୟ ମୁଖ୍ୟ ଗବେଷକ ଥିଲେ। କିଶୋରଙ୍କୁ ଟିକାକଣ ନିଷ୍ପତ୍ତି ପୂର୍ବରୁ ବିଭିନ୍ନ ରାଷ୍ଟ୍ରରେ ଶିଶୁଙ୍କୁ ଟିକାକରଣ କରାଯିବା ପରେ ମିଳିଥିବା ଫଳାଫଳକୁ ତର୍ଜମା କରାଯିବା ଜରୁରୀ ଥିଲା।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଘୋଷଣା ଅନୁଯାୟୀ ଜାନୁଆରୀ ୩ ତାରିଖରୁ ଦେଶର ସମସ୍ତ ୧୫ରୁ ୧୮ବର୍ଷର କିଶୋର, କିଶୋରୀଙ୍କୁ କରୋନା ଟିକା ଦିଆଯିବ। ଦେଶରେ ଓମିକ୍ରନ ପ୍ରଜାତି ଭୂତାଣୁର ସଂକ୍ରମଣକୁ ନେଇ ସରକାର ଏହି ନିଷ୍ପତ୍ତି ନେଇଛନ୍ତି। ୨୦୧୧ ଜନଗଣନା ଅନୁଯାୟୀ ଦେଶରେ ଏବେ ଏହି ବର୍ଗରେ ୭.୪ କୋଟି କିଶୋର, କିଶୋରୀ ଅଛନ୍ତି।
