ଛତ୍ରପୁର: ଛତ୍ରପୁର ଥାନା ଅଧୀନ ପୁରୁଣା ପୋଷ୍ଟ ଅଫିସ ସାହିରେ ଥିବା ଏକ ଘରୋଇ କମ୍ୟୁଟର ଶିକ୍ଷାନୁଷ୍ଠାନରୁ ଗତକାଲି ବିଳମ୍ବିତ ରାତ୍ରରେ ଚୋରି କରିବା ସହିତ ନିଆଁ ଲଗାଇଛନ୍ତି ଦୁର୍ବୁତ୍ତ l ଏହାସହ ଜୀବନରୁ ମାରିଦେବାକୁ କାଚ କବାଡ଼ରେ ଲେଖି କରି ଧମକ ଦେଇଛନ୍ତି । ପୁରୁଣା ପୋଷ୍ଟ ଅଫିସ ସାହି ସ୍ଥିତ ଏଜୁ କେର କମ୍ପ୍ୟୁଟର ଅନୁଷ୍ଠାନରୁ ଗତକାଲି ବିଳମ୍ବିତ ରାତ୍ରରେ ଦୁର୍ବୁତ୍ତମାନେ ପଶି କମ୍ପ୍ୟୁଟର, ଏସି ସମେତ ବହୁ ଆସବାବ ପତ୍ର ନିଆଁ ଲଗାଇ ନଷ୍ଟ କରିବା ସହିତ ହାର୍ଡ ଡିସ୍କ ଭଳି କିଛି ଜିନିଷ ଚୋରି କରିଛନ୍ତି l ଏହା ସହ ଧମକ ଦେଇ ଲେଖିଛନ୍ତି ଯେ ମୁଁ କେବଳ ତୋ ପାଇଁ ଆସିଛି, ଏତେ ସହଜରେ ମୁଁ ତୋତେ ମାରିବି ନାହିଁ, ତୋତେ ଟର୍ଚ୍ଚର କରି ମାରିବି ବୋଲି କବାଟ ରେ ଲେଖି ଧମକ ଦେଇଛନ୍ତି ଦୁର୍ବୁତ୍ତ l ଏପରିକି ନିଜକୁ ଘୋଷ୍ଟ ବୋଲି ଲେଖିଛି ।
ଆଜି ସକାଳୁ ସ୍ଥାନୀୟ ବାସିନ୍ଦା ନିଆଁ ଲାଗିବାର ଦେଖି ଦମକଳ ବାହିନୀକୁ ଜଣାଇଥିଲେ l ଦମକଳ ବାହିନୀ ପହଞ୍ଚି ନିଆଁକୁ ଆୟତ୍ତ କରିଥିଲେ l ଅନ୍ୟପଟେ ଛତ୍ରପୁର ଥାନା ପୁଲିସ ପହଞ୍ଚି ତଦନ୍ତ କରିଛି l ତେବେ କିଏ ଏପରି କାଣ୍ଡ ଘଟାଇଛି ଏବଂ କାହିଁକି ଏପରି କରିଛି, କିଛି ବ୍ୟବସାୟୀକ ଶତ୍ରୁ ନା ଆଉ କିଛି କାରଣ ରହିଛି ତାହା ବର୍ତ୍ତମାନ ସୁଦ୍ଧା ଅସ୍ପଷ୍ଟ ରହିଛି ।
