ଇସଲାମାବାଦ : ଇରାନ ଚାବହାର ବନ୍ଦର ପ୍ରକଳ୍ପରେ ସାମିଲ ହେବାକୁ ପାକିସ୍ତାନ ଏବଂ ଚୀନଙ୍କୁ ଆମନ୍ତ୍ରଣ କରିଛି । ଗଣମାଧ୍ୟମ ଖବର ଅନୁସାରେ ୩ ଦିନିଆ ପାକିସ୍ତାନ ଗସ୍ତରେ ଥିବା ଇରାନର ବିଦେଶ ମନ୍ତ୍ରୀ ଜାଭେଦ ଜରିଫ ଇସଲାମାବାଦଠାରେ ସୋମବାର ଏହି ପ୍ରସ୍ତାବ ଦେଇଛନ୍ତି ।
ସେ କହିଛନ୍ତି ଯେ ଚାବହାର ବନ୍ଦର ପ୍ରକଳ୍ପ କାହା ଉପରେ ଚାପ ପ୍ରୟୋଗ କରିବା କିମ୍ବା ଘେରିବାକୁ କରାଯାଇନାହିଁ । ତେଣୁ ପାକିସ୍ତାନ ଓ ଚୀନକୁ ଏହି ପ୍ରକଳ୍ପରେ ସାମିଲ ହେବାକୁ ସେ ନିମନ୍ତ୍ରଣ କରିଛନ୍ତି । ଏହାସହ ଜାଭେଦ ଚୀନ- ପାକିସ୍ତାନ ଆର୍ଥିକ କରିଡ଼ର (ସିପିଇସି)ରେ ଇରାନକୁ ସାମିଲ କରିବାକୁ ନିଜର ଅଭିଳାଷ ଜାହିର କରିଛନ୍ତି ।
ପ୍ରକାଶ ଯେ ଚାବହାର ପ୍ରକଳ୍ପ ପାଇଁ ଭାରତ, ଇରାନ ଏବଂ ଆଫଗାନିସ୍ତାନ ମଧ୍ୟରେ ୨୦୧୬ରେ ରାଜିନାମା ସ୍ୱାକ୍ଷର ହୋଇଥିଲା । ଏହାଦ୍ୱାରା ପାକିସ୍ତାନ ଉପରେ ନିର୍ଭର ନକରି ଭାରତ ମଧ୍ୟପ୍ରାଚ୍ୟ ଦେଶ ସହ ବାଣିଜ୍ୟ ସମ୍ପର୍କ ରଖିପାରିବ । ଏପରିକି ଇସଲାମାବାଦ ଇନଷ୍ଟିଚ୍ୟୁଟ୍ ଅଫ ଷ୍ଟଡିଜ୍ରେ ଅଭିଭାଷଣ ଦେଇ ଜାଭେଦ କହିଥିଲେ ଯେ କେହି ବି ଇରାନ ଭୂମିକୁ ବ୍ୟବହାର କରି ପାକିସ୍ତାନକୁ କ୍ଷତି ପହଞ୍ଚାଇ ପାରିବେ ନାହିଁ ।
ଏହାସହ ସାଉଦି ଆରବ ସହ ପାକିସ୍ତାନର ଯେପରି ସମ୍ପର୍କ ଭାରତ ସହ ଇରାନର ସମ୍ପର୍କ ସେପରି ବୋଲି ଜାଭେଦ ପ୍ରକାଶ କରିଥିଲେ । ଅର୍ଥାତ ଭାରତ ସହ ଇରାନର ଦ୍ୱିପାକ୍ଷିକ ସମ୍ପର୍କ ମଜଭୁତ ରହିଥିବା ସେ ପରୋକ୍ଷରେ ଦର୍ଶାଇଥିଲେ ।
