ବେଙ୍ଗାଲୁରୁ: କାଫେ କଫି ଡେ’(ସିସିଡି)ର ପ୍ରତିଷ୍ଠାତା ଭି.ଜି. ସିଦ୍ଧାର୍ଥଙ୍କ ମୃତ୍ୟୁର ୩ ସପ୍ତାହ ପରେ ତାଙ୍କ ବାପା ଗାଙ୍ଗେୟା ହେଗ୍ଡେଙ୍କ ପରଲୋକ ଘଟିଛି। ଦୀର୍ଘଦିନ ଧରି ସେ ଅସୁସ୍ଥ ଥିଲେ। ତାଙ୍କୁ ସନ୍ଥବେରୀ ଗୋପାଳ ଗୌଡ଼ା ହସ୍ପିଟାଲରେ ଭର୍ତ୍ତି କରାଯାଇଥିଲା। ରବିବାର ସେଠାରେ ତାଙ୍କର ମୃତ୍ୟୁ ଘଟିଛି।
ଗତ ଜୁଲାଇ ୨୯ରେ ନେତ୍ରାବତୀ ନଦୀ ପୋଲ ଉପରୁ ସିଦ୍ଧାର୍ଥ ନିଖୋଜ ହୋଇଯାଇଥିଲେ। ପରେ ଜୁଲାଇ ୩୧ରେ ମାଙ୍ଗାଲୁରୁର ହୋଗିବଜାର ନିକଟ ନେତ୍ରାବତୀ ନଦୀରୁ ତାଙ୍କ ମୃତଦେହ ଉଦ୍ଧାର ହୋଇଥିଲା। ସିଦ୍ଧାର୍ଥଙ୍କ ବାପା ଗାଙ୍ଗେୟା ହେଗଡେ କର୍ଣ୍ଣାଟକର ଚିକ୍ମାଗାଲୁର ଜିଲାର ଜଣେ କଫି ଚାଷୀ ଥିଲେ। ପରେ ସେ ଏଥିରେ ସଫଳ ହେବା ସହିତ ପ୍ରତିଷ୍ଠିତ କଫି ବ୍ୟବସାୟୀ ଭାବେ ବହୁ ଖ୍ୟାତି ଅର୍ଜନ କରିଥିଲେ। ପରେ ସିଦ୍ଧାର୍ଥ ସିସିଡି ପ୍ରତିଷ୍ଠା କରିଥିଲେ। ଦେଶବ୍ୟାପୀ ଏହା କଫି ବ୍ୟବସାୟକୁ ଆଗକୁ ନେବାରେ ସଫଳ ହୋଇଥିଲା।
