ନୂଆଦିଲ୍ଲୀ : କେନ୍ଦ୍ର ମାନବ ସମ୍ବଳ ବିକାଶ ମନ୍ତ୍ରଣାଳୟ ଦ୍ୱାଦଶ ଶ୍ରେଣୀ ପ୍ରଶ୍ନପତ୍ର ପ୍ରଘଟ ମାମଲାରେ ସିବିଏସଇର ଜଣେ ଅଧିକାରୀଙ୍କୁ ନିଲମ୍ବିତ କରିଛନ୍ତି । ଔପଚାରିକ ଭାବେ ମାମଲାର ତଦନ୍ତ ଆରମ୍ଭ ହୋଇଛି । ରବିବାର ଦିଲ୍ଲୀ ପୁଲିସର କ୍ରାଇମବ୍ରାଞ୍ଚ ଦିଲ୍ଲୀ ବାୱାନା ଅଞ୍ଚଳର ଏକ ଘରୋଇ ସ୍କୁଲର ଦୁଇଜଣ ଶିକ୍ଷକ ଓ ଜଣେ କୋଚିଂ ସେଣ୍ଟର ମାଲିକଙ୍କୁ ମିଶାଇ ୩ ଜଣଙ୍କୁ ଗିରଫ କରିଛି । ଶିକ୍ଷା ସଚିବ ଅନିଲ ସୌରୁପ ଟ୍ୱିଟ୍ କରି ଏହି ସୂଚନା ଦେଇଛନ୍ତି । ସୌରୁପ ଟ୍ୱିଟ୍ କରିଛନ୍ତି ଯେ ଦ୍ୱାଦଶ ଶ୍ରେଣୀ ଅର୍ଥନୀତି ପ୍ରଶ୍ନପତ୍ର ପ୍ରଘଟ ମାମଲାର ପ୍ରାଥମିକ ତଦନ୍ତରେ ନୂଆଦିଲ୍ଲୀ ମୁଙ୍ଗେଶପୁରସ୍ଥିତ ମଦର ଖାଜାନି କନଭେଣ୍ଟ ସ୍କୁଲର ଜଣେ ଶିକ୍ଷକ, ଗୋଟିଏ କୋଚିଂ ସେଣ୍ଟରର ମାଲିକଙ୍କୁ ଗିରଫ କରାଯାଇଥିବାବେଳେ ସିବିଏସ୍ଇର ଜଣେ କର୍ମଚାରୀ ପର୍ଯ୍ୟବେକ୍ଷଣରେ ଅବହେଳା କରିଥିବା ଜାଣିବାକୁ ମିଳିଛି । ଫଳରେ କର୍ମଚାରୀ ଜଣଙ୍କୁ ନିଲମ୍ବନ କରାଯାଇ ତଦନ୍ତ ପରିସରଭୁକ୍ତ କରାଯାଇଛି। ପ୍ରଶ୍ନପତ୍ର ପ୍ରଘଟକୁ ନେଇ ତିନିଜଣଙ୍କୁ ଗିରଫ କରାଯାଇଥିବା ନେଇ ଦିଲ୍ଲୀ ପୁଲିସର ସ୍ୱତନ୍ତ୍ର କମିଶନର ଆରପି ଉପାଧ୍ୟାୟ ଓ ଯୁଗ୍ମ କମିଶନର ଆଲୋକ କୁମାର ସ୍ପଷ୍ଟ କରିଛନ୍ତି। ଗିରଫ ପୂର୍ବରୁ ପୁଲିସ ତିନିଟି ପବ୍ଲିକ ସ୍କୁଲର ୬ଜଣ ଶିକ୍ଷକ ଓ ଜଣେ ଅଧ୍ୟକ୍ଷଙ୍କୁ ଜେରା କରିଥିଲା। ପ୍ରଶ୍ନପତ୍ର ପ୍ରଘଟ ଘଟଣାକୁ ନେଇ ସିବିଏସଇର ଆଞ୍ଚଳିକ ନିର୍ଦେଶକଙ୍କ ଅଭିଯୋଗ ଆଧାରରେ ଦିଲ୍ଲୀ ପୁଲିସ ଦୁଇଟି ମାମଲା ରୁଜୁ କରିଛି। ଦ୍ୱାଦଶ ଶ୍ରେଣୀ ଅର୍ଥନୀତି ପ୍ରଶ୍ନପତ୍ର ପ୍ରଘଟ ପାଇଁ ମାର୍ଚ୍ଚ ୨୭ରେ ମାମଲା ରୁଜୁ ହୋଇଥିଲା। ସେହିପରି ଦଶମ ଶ୍ରେଣୀ ଗଣିତ ପ୍ରଶ୍ନପତ୍ର ପ୍ରଘଟ ପାଇଁ ମାର୍ଚ୍ଚ ୨୮ରେ ଆଉ ଏକ ମାମଲା ରୁଜୁ ହୋଇଥିଲା। ଏହି ମାମଲା ଉପରେ ଏସଆଇଟି ତଦନ୍ତ ଜାରି ରହିଛି। ପ୍ରଶ୍ନପତ୍ର ପ୍ରଘଟ କାରଣରୁ ଏପ୍ରିଲ ୨୫ରେ ଦ୍ୱାଦଶ ଶ୍ରେଣୀ ଅର୍ଥନୀତି ପରୀକ୍ଷା ପୁନର୍ବାର କରିବାକୁ ସିବିଏସଇ ନିଷ୍ପତ୍ତି ନେଇଛି।
Popular Categories
Previous article
Next article