ଗୁରୁଡିଝାଟିଆ: ବ୍ରହ୍ମପୁର ଗାଁରେ ଯାତ୍ରା ପ୍ରସ୍ତୁତି ବୈଠକ ବେଳେ ଗଣ୍ଡଗୋଳ ଘଟଣାରେ ଖୁଣ୍ଟୁଣୀ ଥାନା ପୁଲିସ ୨୮ ଜଣଙ୍କ ନାମରେ ମାମଲା ରୁଜୁ କରିଛି। ଏହା ସହିତ ୩ ଜଣଙ୍କୁ ଗିରଫ କରାଯାଇଛି। ବୈଠକ ଚାଲିଥିବାବେଳେ ଦୁଇ ଗୋଷ୍ଠୀ ମଧ୍ୟରେ ଗଣ୍ଡଗୋଳ ଯୋଗୁ ଜଣେ ଆହତ ହୋଇଥିଲେ। ମାରପିଟ ଏବଂ ଗାଳିଗୁଲଜ ନେଇ ଉଭୟ ଗୋଷ୍ଠୀ ପକ୍ଷରୁ ୨୮ ଜଣକ ନାଁରେ ଅଭିଯୋଗ ହୋଇଥିଲା।
ଅନ୍ୟପଟେ ଗାଁରେ ବାତାବରଣ ଅଶାନ୍ତ ରହିଥିବାରୁ ବାରୁଣୀ ସ୍ନାନ ଯାତ୍ରା କିଭଳି ହେବ ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏହି ଗଣ୍ଡଗୋଳ ମାମଲାରେ ପ୍ରକାଶ ବିଶ୍ବାଳ ଓ ନରେନ୍ଦ୍ର ମଲ୍ଲିକ ଥାନାରେ ଲିଖିତ ଅଭିଯୋଗ କରିଛନ୍ତି। ଉଭୟ ପକ୍ଷରୁ ୩ ଜଣଙ୍କୁ ଗିରଫ କରାଯାଇଥିବା ପୁଲିସ ସୂତ୍ରରୁ ପ୍ରକାଶ। ଉଲ୍ଲେଖଯୋଗ୍ୟ, ଗଡ଼ଜାତ ଓ ମୋଗଲବନ୍ଦୀ ଅଞ୍ଚଳର ସଂସ୍କୃତି, ଭାଇଚାରା ଓ ପରମ୍ପରାର ପ୍ରତୀକ ହେଉଛି ବାରୁଣୀ ଯାତ୍ରା। ପ୍ରଭୁ ଧବଳେଶ୍ଵର ଓ ସର୍ପେଶ୍ୱର ମହାଦେବଙ୍କ ମହାମିଳନ କଖଡିଠାରେ ଅନୁଷ୍ଠିତ ହେବା ପରେ ବିମାନରୁଢ ଠାକୁର ବ୍ରହ୍ମପୁର ଗାଁ ଦେଇ ଯାଇଥିବା ମହାନଦୀର ସିଦ୍ଧନାରାୟଣୀ ବାରୁଣୀ ଘାଟରେ ବାରୁଣୀ ସ୍ନାନ କରିଥାନ୍ତି। ହଜାର ହଜାର ଶ୍ରଦ୍ଧାଳୁ ବୁଡ ପକାଇବାକୁ ଆସିଥାନ୍ତି। ଏହି ଯାତ୍ରା ନଦୀକୁଳ ଅଞ୍ଚଳର ବାଲିଯାତ୍ରା ଭାବେ ପରିଚିତ । ୨୮ ଗାଁର ଜନସାଧାରଣ ଓ ବନ୍ଧୁ ବୁଡ ପକାଇବା ସହିତ ଯାତ୍ରା ଦେଖିବାକୁ ଆସିଥାନ୍ତି। ଗାଁ ଯାତ୍ରା ବୈଠକକୁ କେନ୍ଦ୍ରକରି ଦେଖା ଦେଇଥିବା ବିଶୃଙ୍ଖଳା ପରିସ୍ଥିତିକୁ ପ୍ରଶମିତ କରି ଶାନ୍ତି ଫେରାଇ ଆଣିବାକୁ ପ୍ରଶାସନ ଉଦ୍ୟମ କରିବା ଉଚିତ ବୋଲି ବୁଦ୍ଧିଜୀବୀ ମହଲରେ ମତପ୍ରକାଶ ପାଇଛି।
