ବେଗୁନିଆ: ବେଗୁନିଆ ପୁଲିସ ଆଜି ଭୋର ସମୟରେ ପାଟ୍ରୋଲିଂ କରୁଥିବା ବେଳେ ଚଟୁଆ-କଡବ ରାସ୍ତାରୁ ଏକ ଟ୍ରକରେ ଯାଉଥିବା ୧୨ ଟନ ଗୋମାଂସ ଜବତ କରିବା ସହିତ ଗାଡି ଡ୍ରାଇଭରଏବଂ ହେଲ୍ପରକୁ ଗିରଫ କରି କୋର୍ଟ ଚାଲାଣ କରିଛି।ପୁଲିସ ପାଟ୍ରୋଲିଂ କରୁଥିବା ସମୟରେ ଭୋର ୪ ଟା ସମୟରେ ଉକ୍ତ ରାସ୍ତାରେ ସମ୍ପୃକ୍ତ ଟ୍ରକଟିକୁ ଦେଖି ସନ୍ଦେହ ହେବାରୁ ଅଟକାଇ ଥିଲେ। ପରେ ଡ୍ରାଇଭରକୁ ପଚରା ଉଚରା କରିବା ପରେ ଆଠଗଡ ତିଗିରିଆରୁ ଗୋମାଂସ ନେଇ ଆସିଥିବା ଏହି ଟ୍ରକଟି ହାଇଦ୍ରାବାଦ ଯାଉ ଥିବାର ଜଣାପଡିଥିଲା। ପରେ ଗାଡିଟିକୁ ଏଏସଆଇ ପୀତବାସ ମହାନ୍ତି ଏବଂ ଥାନା କର୍ମଚାରୀମାନେ ଥାନାକୁ ଆଣିଥିଲେ। ଏଥିରେ ୧୨୦ କୁଇଣ୍ଟାଲ ଗୋମାଂସ ଥିବାର ଜଣାପଡିଥିଲା। ପଶୁ ଚିକିତ୍ସକ ଆସି ନମୁନା ସଂଗ୍ରହ କରି ପରୀକ୍ଷା କରିବା ପାଇଁ ଓୟୁଏଟିକୁ ପଠାଯାଇଛି। ଗାଡି ଡ୍ରାଇଭର ମହାରାଷ୍ଟ୍ର ଓସମାବାଦ କେସିଗାଓଁର ଇରଫାନ ମହମଦ ଶେଖ ଏବଂ କଟକ ନିଆଳିର ହେଲ୍ପର ଶେଖ ଆୟୁବଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି। ମାଂସକୁ ରାଉତପଡା ପଥରଖଣି ନିକଟରେ ଥିବା ଗାତ ଖୋଳି ପୋତି ଦିଆଯାଇଛି। ଏ ସଂକ୍ରାନ୍ତରେ ବେଗୁନିଆ ଥାନାରେ ମାମଲା ରୁଜୁ କରାଯାଇ ଥାନା ଅଧିକାରୀ ଲଷ୍ମୀ ପ୍ରସାଦ ଶତପଥୀ ଘଟଣାର ତଦନ୍ତ କରୁଛନ୍ତି।
Popular Categories
Previous article
Next article