ଦରମା ବୃଦ୍ଧି ଦାବିରେ କର୍ମଚାରୀଙ୍କ କାର୍ଯ୍ୟବନ୍ଦ ଆନ୍ଦୋଳନ

କେନ୍ଦୁଝରଗଡ଼ : ମାସିକ ୨୦ ପ୍ରତିଶତ ଦରମା ବୃଦ୍ଧି ଦାବିରେ ସଦର ଥାନା ଅଧିନ ପଳାଶପଙ୍ଗା ପଞ୍ଚାୟତ ମୁରୁସୁଆଁସ୍ଥିତ ବ୍ରାଣ୍ଡ ଆଲଏଜ ଆଣ୍ଡ ଷ୍ଟିଲ କାରଖାନା କର୍ମଚାରୀ ବୁଧବାର ଠାରୁ କାର୍ଯ୍ୟବନ୍ଦ ଆନ୍ଦୋଳନ କରିଛନ୍ତି । ଫଳରେ ୩ଦିନ ଧରି କାରଖାନାର ବ୍ୟବସାୟିକ ଉତ୍ପାଦନ ବାଧାପ୍ରାପ୍ତ ହୋଇଛି । କର୍ମଚାରୀ କାର୍ଯ୍ୟବନ୍ଦ ଆନ୍ଦୋଳନରେ ସାମିଲ ହୋଇ କାରଖାନା ଭିତରେ ରହି କଞ୍ଚାମାଲ ବୋଝେଇ ଟ୍ରକକୁ କାରଖାନା ଭିତରକୁ ପ୍ରବେଶ କରିବାକୁ ଦେଉନଥିବା ବେଳେ କାରଖାନା ଭିତରୁ ଉତ୍ପାଦିତ ସାମଗ୍ରୀ ବୋଝେଇ ଟ୍ରକକୁ ମଧ୍ୟ ବାହାରକୁ ଛାଡୁନଥିବା କାରଖାନା ପରିଚାଳନା ଦାୟିତ୍ୱରେ ଥିବା ଅଧିକାରୀଙ୍କ ପାଇଁ ମୁଣ୍ଡବ୍ୟଥାର କାରଣ ପାଲଟିଛି ।

ଆନ୍ଦୋଳନର ତୃତୀୟ ଦିନରେ ଶୁକ୍ରବାର ମଧ୍ୟ ଦାବି ପୁରଣ ନେଇ କାରଖାନା କର୍ତ୍ତୃପକ୍ଷ କୌଣସି ପଦକ୍ଷେପ ଗ୍ରହଣ ନକରିବାରୁ କୋଇଲା ଓ ଡୋଲମାଇଟ୍‌‌ ଖାଲି କରିବାକୁ ଆସିଥିବା କଞ୍ଚାମାଲ ବୋଝେଇ ଟ୍ରକକୁ ଚାଳକମାନେ କାରଖାନା ମୁଖ୍ୟଫାଟକକୁ ଅବରୋଧ କରି ରଖିବା ଫଳରେ କର୍ମଚାରୀ ସନ୍ଧ୍ୟାରେ ବାଧ୍ୟ ହୋଇ କାରଖାନା ପଛପଟ ଫାଟକ ଦେଇ ଘରକୁ ଫେରିଛନ୍ତି। ସେହିଭଳି କଞ୍ଚାମାଲ ଖାଲି କରିବାକୁ ଆସି ୪ଦିନ ଧରି କାରଖାନା ମୁଖ୍ୟଫାଟକ ସମ୍ମୁଖରେ ୨୫ରୁ ଅଧିକ ମାଲବାହୀ ଟ୍ରକ ଅଟକି ରହିଥିବାରୁ ମାଲ ଖାଲି କରିନପାରି ଚାଳକମାନଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇବାରେ ଲାଗିଛି । କର୍ମଚାରୀ ଦରମା ବୃଦ୍ଧି ନେଇ ଗତ ମେ’ ମାସରୁ କମ୍ପାନୀ କର୍ତ୍ତୃପକ୍ଷଙ୍କୁ ଲିଖିତ ଭାବେ ଅବଗତ କରିଥିଲେ ହେଁ କୌଣସି ପଦକ୍ଷେପ ଗ୍ରହଣ ନକରିବାରୁ ଶେଷରେ ବାଧ୍ୟ ହୋଇ ବୁଧବାର ଠାରୁ କାର୍ଯ୍ୟବନ୍ଦ ଆନ୍ଦୋଳନରେ ସାମିଲ ହୋଇଛୁ ବୋଲି ଜନୈକ କର୍ମଚାରୀ କହିଛନ୍ତି । ଦାବି ପୁରଣ ନେଇ କର୍ତ୍ତୃପକ୍ଷଙ୍କ ସହ ଆଲୋଚନା ଚାଲିଛି ଏବଂ ଖୁବ୍‌‌ ଶୀଘ୍ର ସମସ୍ୟାର ସମାଧାନ କରାଯିବ ବୋଲି କାରଖାନା ପରିଚାଳକ ସବ୍ୟସାଚୀ ମହାନ୍ତି କହିଛନ୍ତି ।