ସମାଜ ଡିଜିଟାଲ ଡେସ୍କ: ଶୁକ୍ରବାର ବେଙ୍ଗାଲୁରୁ ରମେଶ୍ୱରମ୍ କାଫେରେ ବୋମା ବିସ୍ଫୋରଣ ଘଟଣାରେ ଏନଆଇଏ ଏବଂ ଏଏସଜି ଟିମ ପକ୍ଷରୁ ତଦନ୍ତ ଜୋରଦାର କରାଯାଇଛି। ଆତଙ୍କବାଦୀ ସଂଗଠନ ଇସଲାମିକ୍ ଷ୍ଟେଟ୍ ସହିତ ଜଡିତ ସଂଗଠନ ଏହି ବିସ୍ଫୋରଣରେ ସମ୍ପୃକ୍ତି ଥିବା କୁହାଯାଉଛି। ଏହି ଘଟଣାକୁ ଗୁରୁତର ସହ ନେଇ ତଦନ୍ତ ପାଇଁ ସ୍ୱତନ୍ତ୍ର ଟିମ୍ ଗଠନ କରାଯାଇଛି।
ଅନ୍ୟପଟେ ବିସ୍ଫୋରଣ ଘଟାଇଥିବା ସନ୍ଦିଗ୍ଧକୁ ଚିହ୍ନଟ କରାଯାଇଥିବା ଜଣାପଡିଛି। ସିସିଟିଭି ଫୁଟେଜ ଆଧାରରେ ଏହା ସମ୍ଭବ ହୋଇଛି। କୁହାଯାଉଛି ଯେ ସନ୍ଦିଗ୍ଦ ଜଣଙ୍କ ବଜାରରୁ କେମିକାଲ କିଣି ୟୁଟ୍ୟୁବରୁ ବୋମା ତିଆରି ଶିଖିବା ପରେ ଏହାକୁ ତିଆରି କରିଥାଇପାରେ। ପ୍ରାଥମିକ ତଦନ୍ତରୁ ଜଣାପଡିଛି ଯେ ବଜାରରେ ସହଜରେ ମିଳୁଥିବା ରାସାୟନିକ ପଦାର୍ଥ, ପୋଟାସିୟମ୍ ନାଇଟ୍ରେଟ୍ ଏବଂ ବନ୍ଧୁକ ପାଉଡର ଆଇଡି ତିଆରିରେ ବ୍ୟବହୃତ ହୋଇଛି। ଜଣେ ତଦନ୍ତକାରୀ ଅଧିକାରୀ କହିଛନ୍ତି ଯେ ଫୋରେନସିକ୍ ରିପୋର୍ଟ ଆସିବା ପରେ ଘଟଣା ସମ୍ପର୍କରେ ବିସ୍ତୃତ ତଥ୍ୟ ଦିଆଯିବ। ମାମଲାରେ ଆତଙ୍କବାଦୀ ସଂଗଠନ ଆଇଏସ୍ ସହ ଜଡିତ ଲୋକଙ୍କୁ ଖୋଜା ଚାଲିଛି। ଅନୁସନ୍ଧାନକାରୀ ସଂସ୍ଥା ପକ୍ଷରୁ କୁହାଯାଇଛି ଯେ ଏହି ମାମଲାରେ ଅନେକ ପ୍ରମାଣ ମିଳିଛି, ଯାହାକୁ ଆଧାର କରି ଅଭିଯୁକ୍ତଙ୍କୁ ଶୀଘ୍ର ଗିରଫ କରାଯିବ।
