ବୌଦ୍ଧ: ରାଜ୍ୟ ଭଲିବଲ ସଂଘ ଆନକୂଲ୍ୟରେ ଜିଲା କ୍ରିଡା ସଂସଦ ପକ୍ଷରୁ ବୌଦ୍ଧ ଷ୍ଟାଡିୟମଠାରେ ଚାଲିଥିବା ୬୯ତମ ରାଜ୍ୟସ୍ତରୀୟ ଭଲିବଲ ପ୍ରତିଯୋଗିତାର ଦ୍ୱିତିୟ ଦିନର ଖେଳ ଲଘୁଚାପ ବର୍ଷା ଯୋଗୁଁ ବାଧାପ୍ରାପ୍ତ ହୋଇଛି। ଆଜି ୫ଗୋଟି ମ୍ୟାଚ୍ ଅନୁଷ୍ଠିତ ହେବାପରେ ପରବର୍ତ୍ତି ମ୍ୟାଚ୍ ପାଇଁ ବର୍ଷା ବାଧକ ହେବାରୁ ପଡିଆକୁ ଘୋଡାଇ ରଖାଯାଇଛି। ବର୍ଷା କମିବା ପରେ ଅନକୂଳ ପାଗ ହେଲେ ରାତିରେ ଫ୍ଲଡଲାଇଟ ସହାୟତାରେ ମଧ୍ୟ ବଳକା ମ୍ୟାଚ ସଂପୁର୍ଣ୍ଣ କରାଯିବ ବୋଲି ଆୟୋଜକଙ୍କ ପକ୍ଷରୁ ସୂଚନା ଦିଆଯାଇଛି।
ଶୁକ୍ରବାର ଅନୁଷ୍ଠିତ ହୋଇଥିବା ୫ ଗୋଟି ଯୋଗ୍ୟତା ପର୍ଯ୍ୟାୟ ଲିଗ ମ୍ୟାଚରେ କନ୍ଧମାଳ ୨-୦ରେ ବଲାଙ୍ଗୀରକୁ, କଟକ ୨-୦ରେ ଖୋର୍ଦ୍ଧାକୁ, କିଟ୍ ୨-୦ରେ କେନ୍ଦ୍ରାପଡାକୁ ଇଷ୍ଟକୋଷ୍ଟ ରେଲୱେ ୨-୦ରେ ଜଗତସିଂହପୁରକୁ ଓ କନ୍ଧମାଳ ଦଳ ୨-୦ରେ ସମ୍ବଲପୁରକୁ ପରାଜିତ କରିଥିଲା। ଯୋଗ୍ୟତା ପର୍ଯ୍ୟାୟ ଲିଗ ମ୍ୟାଚ ପରେ କିଟ୍, ସୁନ୍ଦରଗଡ, ଖୋର୍ଦ୍ଧା, ପାରାଦୀପ ପୋର୍ଟ, କଟକ, ଜଗତସିଂହପୁର ଓ ଇଷ୍ଟକୋଷ୍ଟ ରେଲୱେ ଦଳ କ୍ୱାର୍ଟର ଫାଇନାଲ ପର୍ଯ୍ୟାୟରେ ପ୍ରବେଶ କରିଛନ୍ତି। କେନ୍ଦ୍ରାପଡା ଓ କନ୍ଧମାଳ ମଧ୍ୟରେ ହେବାକୁ ଥିବା ମ୍ୟାଚ୍ ପରେ ଯେଉଁ ଦଳ ବିଜୟୀ ହେବ କ୍ୱାର୍ଟର ଫାଇନାଲରେ ପ୍ରବେଶ କରିବ।
ବିଧାୟକ ପ୍ରଦିପ କୁମାର ଅମାତ ମୁଖ୍ୟଅତିଥି ଭାବରେ ଯୋଗଦେଇ ଖେଳାଳୀମାନଙ୍କ ସହ ପରିଚିତ ହେବା ସହିତ ସେମାନଙ୍କ ଉତ୍ସାହ ବୃଦ୍ଧି କରିଥିଲେ। ଏହି ଅବସରରେ ସାଂସଦ ପ୍ରତିନିଧି ତାରେଣି କୁମାର ମହାପାତ୍ର, ଜିଲା କ୍ରିଡା ସଂସଦର ସମ୍ପାଦକ ରବିନ୍ଦ୍ର କୁମାର ରାଉତ, ଜିଲା କ୍ରିଡା ଅଧିକାରୀ ପବିତ୍ର କୁମାର ରାଉତ, ଜିଲା ସୂଚନା ଓ ଲୋକସମ୍ପର୍କ ଅଧିକାରୀ ରୀତାକାନ୍ତି ବଳିୟାରସିଂହ ପ୍ରମୁଖ ଉପସ୍ଥିତ ଥିଲେ। ପ୍ରତିଯୋଗିତାକୁ ମୁଖ୍ୟରେଫରୀ ଭାବରେ ସୁବୋଧ କୁମାର ଜେନା ପରିଚାଳନା କରୁଥିବାବେଳେ ଜାତୀୟ ରେଫରୀ ବିଭୁଧେନ୍ଦ୍ର ମାନସିଂହ, ମାନସ କୁମାର ମିଶ୍ର, ବୀରବର ଭଟ୍ଟ, ରୋସନ କୁମାର ସାହୁ, ସଂଜିବ କୁମାର ପଣ୍ଡା, ଦୀପକ କୁମାର ଭୋଇ, ରୋଜି ପ୍ରଧାନ, ଡି.ଶାନ୍ତିଲତା ରେଡୀ, ହେମନ୍ତ ବିଲୁଙ୍ଗ, ବିଷ୍ଣୁ ଶର୍ମା ସାହୁ ଓ ସ୍ଥାନୀୟ କ୍ରିଡା ଶିକ୍ଷକ ଅମ୍ବରୀଶ ପ୍ରଧାନ, ଅରୁଣ କୁମାର ପୁଟ୍ଟା, ସୁରେନ୍ଦ୍ର ନାଥ ସାହୁ, ଦଶରଥ ଭୋଇ, ମନୋଜ କୁମାର ଗାଇଗୌରିଆ, ମମତା ଦାଶ, ଗାୟତ୍ରୀ ବେହେରା ଓ ବନ୍ଦିତା ବିଶ୍ୱାଳ ପ୍ରମୁଖ ସହଯୋଗ କରିଥିଲେ।
