ଗୋପାଳପୁର: ରାଜ୍ୟରେ ସାଧାରଣ ନିର୍ବାଚନ ପାଖେଇ ଆସୁଥିବା ବେଳେ ବିଭିନ୍ନ ରାଜନୈତିକ ଦଳ ଗାଁ ଗାଁରେ ସଭାସମିତି କରି ନିଜର ଶକ୍ତି ପ୍ରଦର୍ଶନ କରିବାରେ ଲାଗିପଡିଛନ୍ତି । ବୁଧବାର ଗୋପାଳପୁର ନିର୍ବାଚନ ମଣ୍ଡଳୀରେ ବିଜୁ ଜନତା ଦଳ କର୍ମୀ ସମ୍ମିଳନୀ ଓ ବନ୍ଧୁ ମିଳନ କାର୍ଯ୍ୟକ୍ରମ ଆଳରେ ନିଜର ଶକ୍ତି ପ୍ରଦର୍ଶନ କରିଛି । ଗୋପାଳପୁର ବିଜେଡି ର ଯୁବନେତା ରାମ ହରି ପାତ୍ରଙ୍କ ନେତୃତ୍ୱରେ ଶତାଧିକ ବିଜେଡି କର୍ମକର୍ତ୍ତା କରାପଲ୍ଲୀ ଛକ ଠାରୁ ମୋଟର ସାଇକେଲ ରାଲି କରିଥିଲେ । ଜିଲ୍ଲା ଯୋଜନା କମିଟି ଅଧ୍ୟକ୍ଷ ତଥା ବ୍ରହ୍ମପୁର ବିଧାୟକ ବିକ୍ରମ କୁମାର ପଣ୍ଡାଙ୍କୁ ଭବ୍ୟ ସ୍ୱାଗତ କରି ଗୋପାଳପୁର ଠାରେ ଅନୁଷ୍ଠିତ ସଭାସ୍ଥଳୀକୁ ପାଛୋଟି ନେଇଥିଲେ ।
ସେଠାରେ ବିଧାୟକ ପଣ୍ଡାଙ୍କୁ ନେତା ଓ କର୍ମୀଙ୍କ ପକ୍ଷରୁ ସମ୍ବର୍ଦ୍ଧନା ଦିଆଯାଇଥିଲା । ଆଗାମୀ ଦିନରେ ବିଜେଡିକୁ ଗୋପାଳପୁର ରେ ଆହୁରି ସଶକ୍ତ କରିବାକୁ ସମସ୍ତ ସଂକଳ୍ପ ନେଇଥିଲେ । ପ୍ରତି ଗ୍ରାମାଞ୍ଚଳରେ ଭିତ୍ତିଭୂମି ବିକାଶ କରିବା ସହିତ ମନ୍ଦିର ଓ ବିଦ୍ୟାଳୟକୁ ରୂପାନ୍ତରିତ କରଣ, ଶିକ୍ଷା, ସ୍ବାସ୍ଥ୍ୟ, ଗମନାଗମନ, ପାନୀୟ ଜଳ ଭଳି ବହୁ ବିକାଶମୂଳକ ପ୍ରକଳ୍ପ ରାଜ୍ୟ ସରକାର ହାତକୁ ନେଇଥିବା କର୍ମୀଙ୍କୁ ଅବଗତ କରାଯାଇଥିଲା । ଏଥିସହ ଗୋପାଳପୁର ନିର୍ବାଚନ ମଣ୍ଡଳୀ ର ସର୍ବାଙ୍ଗୀନ ଉନ୍ନତି ସକାଶେ ବହୁବିଧ କାର୍ଯ୍ୟକ୍ରମ ମାନ ହାତକୁ ନେଇ ଏକ ସ୍ୱତନ୍ତ୍ର ପରିଚୟ ଦେବା ସହ ଖୁବଶୀଘ୍ର ଗୋପାଳପୁର ଠାରେ ମୁହାଣ କାର୍ଯ୍ୟ ଆରମ୍ଭ ହେବା ସହ ଟେଣ୍ଡର କାମ ଶେଷ ହୋଇଯାଇଛି ବୋଲି ବିଧାୟକ କହିଛନ୍ତି । ଆମେ ସମସ୍ତେ ଏକତ୍ରିତ ହୋଇ ଗୋପାଳପୁର ନିର୍ବାଚନ ମଣ୍ଡଳୀରେ ବିଜେଡିକୁ ଅଧିକରୁ ଅଧିକ ଭୋଟ ଦେଇ ଅଧୁରା କାମକୁ ସମ୍ପୂର୍ଣ କରିବା ପାଇଁ ବିଧାୟକ ଆହ୍ୱାନ ଦେଇଥିଲେ । ଏହି ଅବସରରେ କେଲୁଆପଲ୍ଲୀର କିଛି ବିଜେପି କର୍ମୀ ବିଜେଡିରେ ଯୋଗ ଦେଇଥିଲେ । ବ୍ଲକ ସଭାପତି ଅଜିତ କୁମାର ଦାଶ ସଭାପତି କରିଥିବା ବେଳେ ଯୁବ ନେତା ଶିବରାମ ପାତ୍ର ଧନ୍ୟବାଦ ଦେଇଥିଲେ ।
