ବାଙ୍କୀ : ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ବାଙ୍କୀ ବ୍ଲକର ୩୫ନଂ ଜୋନ ଅଧିନ ୬ଗୋଟି ପଞ୍ଚାୟତ ଏବଂ ଡମପଡା ବ୍ଲକ ଅଧିନ ୩୮ନଂ ଜୋନର ୮ଗୋଟି ପଞ୍ଚାୟତର ଭୋଟ ଗଣତି କାର୍ଯ୍ୟ ବାଙ୍କୀ ସ୍ୱୟଂ ଶାସିତ ମହାବିଦ୍ୟାଳୟ ଏବଂ ରାଣୀ ଶୁକଦେଈ ମହିଳା ମହାବିଦ୍ୟାଳୟ ପରିସରରେ ରବିବାର ଦିନ ଚାଲିଛି। ଡମପଡା ୩୮ନଂ ଜିଲ୍ଲାପରିଷଦ ଜୋନର ୧୦ମ ରାଉଣ୍ଡ ଗଣତିରେ ବିଜୁ ଜନତା ଦଳର ଜିଲ୍ଲାପରିଷଦ ପ୍ରାର୍ଥୀ ଆଶିଷ କୁମାର ସାହୁ ୧୦ହଜାର ୨୪୩ଖଣ୍ଡ ଭୋଟ ଏବଂ ତାଙ୍କ ନିକଟତମ ପ୍ରତିଦ୍ୱନ୍ଦୀ ବିଜେପିର ଜିଲ୍ଲାପରିଷଦ ପ୍ରାର୍ଥୀ ଅନନ୍ତ ନାରାୟଣ ମିଶ୍ର ୩ହଜାର ୯୭୯ଖଣ୍ଡ ଭୋଟ ପାଇଛନ୍ତି । ସୂଚନା ଅନୁଯାୟୀ ବିଜେପି ଠାରୁ ବିଜେଡି ପ୍ରାର୍ଥୀ ୬ହଜାର ୨୬୪ଖଣ୍ଡ ଭୋଟରେ ଆଗୁଆ ରହିଛନ୍ତି। ସେହିପରି ବାଙ୍କୀ ବ୍ଲକ ୩୫ନଂ ଜିଲ୍ଲାପରିଷଦ ଜୋନରେ ବିଜେଡି ପ୍ରାର୍ଥୀ ସଞ୍ଜୟ ପାତ୍ର ଗଣତିର ୭ମ ରାଉଣ୍ଡ ସୁଦ୍ଧା ୮ହଜାର ୨୬୧ଖଣ୍ଡ ଭୋଟ ଏବଂ ତାଙ୍କର ପ୍ରତିଦ୍ୱନ୍ଦୀ କଂଗ୍ରେସ ଜିଲ୍ଲାପରିଷଦ ପ୍ରାର୍ଥୀ ରମେଶ ସେନାପତି ୪ହଜାର ୪୦୫ଖଣ୍ଡ ଭୋଟ ପାଇଛନ୍ତି । ସୂଚନା ଅନୁଯାୟୀ କଂଗ୍ରେସ ଠାରୁ ବିଜେଡି ପ୍ରାର୍ଥୀ ୩ହଜାର ୮୫୬ଖଣ୍ଡ ଭୋଟରେ ଆଗୁଆ ରହିଛନ୍ତି। ଗଣତି କେନ୍ଦ୍ରରେ ସରପଞ୍ଚ ଓ ସମିତିସଭ୍ୟ ପ୍ରାର୍ଥୀଙ୍କର ଭୋଟ ଗଣତି କାର୍ଯ୍ୟ ଚାଲୁରହିଛି। ଏହାର ସମ୍ପୂର୍ଣ୍ଣ ଚିତ୍ର ସୋମବାର ସକାଳେ ସ୍ପଷ୍ଟ ହେବ ବୋଲି ନିର୍ବାଚନ ଅଧିକାରୀଙ୍କ ଠାରୁ ସୂଚନା ମିଳିଛି।
Comments are closed.