ମୁମ୍ବାଇ: ବଲିଉଡ଼ ଅଭିନେତା ଅକ୍ଷୟ କୁମାର ଅଭିନୀତ ଚଳଚ୍ଚିତ୍ର ‘ଭୁଲ୍ ଭୁଲୈୟା’କୁ ଦର୍ଶକ ବହୁତ ଭଲପାଇବା ଦେଇଥିଲେ। ଏହି ଭଲପାଇବାକୁ ଦୃଷ୍ଟିରେ ରଖି ନିର୍ମାତା ଖୁବ୍ ଶୀଘ୍ର ଏହାର ଦ୍ବିତୀୟ ଭାଗ ପ୍ରୋକ୍ଷାଳୟକୁ ଆଣିବାକୁ ଯାଉଛନ୍ତିି। ‘ଭୁଲ୍ ଭୁଲୈୟା-୨’ର ଟିଜର୍ ସାମ୍ନାକୁ ଆସିବା ପରେ ଦର୍ଶକଙ୍କ ମନରେ ଫିଲ୍ମକୁ ନେଇ ଉତ୍ସାହ ଦ୍ବିଗୁଣିତ ହୋଇଛି। ଇତି ମଧ୍ୟରେ ଏହି ଚଳଚ୍ଚିତ୍ରରେ ଅଭିନୟ କରିଥିବା ଅଭିନେତ୍ରୀ ତବୁ ଫିଲ୍ମରୁ ତାଙ୍କ ପ୍ରଥମ ଲୁକ୍ ଶେୟାର କରିଛନ୍ତି।
ନିକଟରେ ସାମାଜିକ ଗଣମାଧ୍ୟମରେ ଅଭିନେତ୍ରୀ ଏକ ଭିଡିଓ ଶେୟାର କରିଛନ୍ତି। ଏଥିରେ ସେ ଖୁବ୍ ଭୟଭୀତ ଥିବା ଦେଖିବାକୁ ମିଳିଛି। ଏଥିସହ ଭିଡିଓରେ ତବୁଙ୍କ ପଛର ଗୋଟିଏ ଆଇନା ଦେଖାଯାଉଛି, ଯେଉଁଥିରେ ଏକ କଳା ଛାଇର କେଶ ଉଡ଼ୁଥିବା ନଜର ଆସିଛି। କିଛି ଦିନ ପୂର୍ବରୁ ଅଭିନେତ୍ରୀ କିଆରା ଆଡ଼ଭାନୀ ମଧ୍ୟ ଫିଲ୍ମରୁ ନିଜ ପ୍ରଥମ ଲୁକ୍ ଶେୟାର କରିଥିଲେ।
ସୂଚନାଯୋଗ୍ୟ, ‘ଭୁଲ୍ ଭୁଲୈୟା-୨’ ଅକ୍ଷୟ କୁମାର ଓ ବିଦ୍ୟା ବାଲନ୍ ଅଭିନୀତ ଚଳଚ୍ଚିତ୍ର ‘ଭୁଲ୍ ଭୁଲୈୟା’ର ଦ୍ବିତୀୟ ଭାଗ। ‘ଭୁଲ୍ ଭୁଲୈୟା-୨’ରେ କାର୍ତ୍ତିକ ଆର୍ଯ୍ୟନ, କିଆରା ଆଡ଼ଭାନୀ, ରାଜପାଲ ଯାଦବ, ସଞ୍ଜୟ ମିଶ୍ରା ଓ ତବୁ ପ୍ରମୁଖ କଳାକାରଙ୍କୁ ଦେଖିବାକୁ ମିଳିବ। ଏହା ଚଳିତ ବର୍ଷର ବହୁପ୍ରତୀକ୍ଷିତ ଚଳଚ୍ଚିତ୍ର ମଧ୍ୟରୁ ଗୋଟିଏ। ମେ’ ୨୦ ତାରିଖରେ ପ୍ରେକ୍ଷାଳୟକୁ ଆସିବ ‘ଭୁଲ୍ ଭୁଲୈୟା-୨’।
Comments are closed.