ଭବାନୀପାଟଣା: ତିନି ଦଫା ଦାବି ନେଇ ଶୁକ୍ରବାରଠାରୁ ସମବାୟ ସମିତି ବା ପ୍ୟାକ୍ସ କର୍ମଚାରୀମାନେ ଅନିର୍ଦ୍ଦିଷ୍ଟ କାଳ ଯାଏଁ କାର୍ଯ୍ୟ ବନ୍ଦ ଆନ୍ଦୋଳନକୁ ଓହ୍ଲାଇଛନ୍ତି। କମନ କ୍ୟାଡ଼ର ରୁଲ ଲାଗୁ, ସପ୍ତମ ବେତନ କମିଶନ ହାରରେ ଦରମା ପ୍ରଦାନ, ଷଷ୍ଠ ବେତେନ କମିଶନର ମହଙ୍ଗା ଭତ୍ତା ୧୬୪ ରୁ ୨୩୦ ପ୍ରତିଶତକୁ ବୃଦ୍ଧି ଦାବି କରି ସେମାନେ କାର୍ଯ୍ୟବନ୍ଦ ଆନ୍ଦୋଳନ କରିଛନ୍ତି। ଏସବୁ ଦାବିକୁ ସରକାର ନିୟମ ଅନ୍ତର୍ଭୁକ୍ତ କରି ବୋର୍ଡକୁ ନିର୍ଦ୍ଦେଶ ଦେଲେ ଉକ୍ତ ପ୍ରାପ୍ୟ ମିଳିବ। ତେବେ ପ୍ୟାକ୍ସ କମଚାରୀଙ୍କ କାର୍ଯ୍ୟବନ୍ଦ ଆନ୍ଦୋଳନ ଯୋଗୁଁ ରବି ଚାଷର ଚାଷୀ ପଞ୍ଜିକରଣ, ସିବିଏସ, ଅନଲାଇନ୍ କାମ ସବୁ ବନ୍ଦ ହୋଇଯିବାର ଆଶଙ୍କା ରହିଛି। ଫଳରେ ଚାଷୀ ଅସୁବିଧାର ସମ୍ମୁଖୀନ ହେବା ହିଁ ସାର ହେବ। ରାଜ୍ୟ ସଂଘର ନିଷ୍ପତ୍ତିକ୍ରମେ ସବୁ ଜିଲ୍ଲାରେ କାର୍ଯ୍ୟ ବନ୍ଦ ଆନ୍ଦୋଳନ ଆରମ୍ଭ ହୋଇଛି। ଏଣୁ ସରକାର ଏଥିପ୍ରତି ତୁରନ୍ତ ଦୃଷ୍ଟି ଦେବାକୁ ଚାଷୀ ମହଲରେ ଦାବି ହେଉଛି। ସଂଘର ଜିଲ୍ଲା ସଭାପତି ସୁରେନ୍ଦ୍ର ପ୍ରଧାନ, ଉପ ସଭାପତି ନିରଞ୍ଜନ ବାଗଙ୍କ ନେତୃତ୍ୱରେ ପ୍ରାୟ ୧୫୦ ଜଣ କର୍ମଚାରୀ ସ୍ଥାନୀୟ ସମବାୟ ସମିତି ସମୂହ ଉପନିବନ୍ଧକଙ୍କ କାର୍ଯ୍ୟାଳୟ ଆଗରେ ଧାରଣାରେ ବସିଛନ୍ତି।
Popular Categories
Previous article
Next article