ଭବାନୀପାଟଣା: ଗତ ୫ ତାରିଖ ଦିନ ଅନୁଷ୍ଠିତ ବିଶ୍ଵ ପରିବେଶ ଦିବସରେ ପରିବେଶ ସୁରକ୍ଷା ପାଇଁ ବ୍ୟାପକ ଗଛ ଲଗାଯିବା ପାଇଁ ବିଭିନ୍ନ ମହଲରେ ଗୁରୁତ୍ଵ ପ୍ରକାଶ ପାଇଥିଲା। ଜିଲାରେ ପରିବେଶ ସନ୍ତୁଳନ ହରାଉଥିବାରୁ ବନ ବିଭାଗଠୁଁ ଆରମ୍ଭ କରି ବିଭିନ୍ନ ସରକାରୀ, ବେସରକାରୀ ସ୍ତରରେ ଉଦବେଗ ପ୍ରକାଶ ପାଇଥିଲା। ହେଲେ ଯେଉଁ ସମୟରେ ଆଡମ୍ବରରେ ବିଶ୍ଵ ପରିବେଶ ଦିବସ ପାଳନ କରାଯାଉଥିଲା ସେହି ସମୟରେ କଳାହାଣ୍ଡିରେ ବହୁ ଗଛ କଟା ଚାଲିଥିଲା। ତା ବି କେଉଁ କୋଣ ଅନୁକୋଣରେ ନୁହେଁ। ଜିଲାର ଏକ ପ୍ରମୁଖ ରାସ୍ତାକୁ ଚଉଡା କରିବା ପାଇଁ ବ୍ୟାପକ ଗଛ କଟା ଯାଇଛି। ଭବାନୀପାଟଣାରୁ ରାୟଗଡାକୁ ସଂଯୋଗ କରୁଥିବା ରାଜ୍ୟ ରାଜପଥର ଛତିଗୁଡ଼ାରୁ କିଡିଙ୍ଗ ରାସ୍ତାରେ ବହୁ ପୁରୁଣା ଗଛ କଟାଯାଇଛି। ପୁଣି ସେସବୁ ଗଛରେ ନିଆଁ ଲଗାଇ ଦିଆ ଯାଇଛି। ଫଳରେ ଏହି ରାସ୍ତାରେ ଏବେ ଆଉ ପୁରୁଣା ଗଛ ଦେଖିବାକୁ ମିଳୁନାହିଁ। ଉଲ୍ଲେଖଯୋଗ୍ୟ ଯେ ଗତ ପ୍ରାୟ ଏକ ବର୍ଷ ଧରି ପିଡବ୍ଲୁଡି ବିଭାଗ ଦ୍ଵାରା ଏହି ରାସ୍ତାର ମରାମତି କାମ ଚାଲିଛି। କାମ ଟି କେବେ ଆରମ୍ଭ ହେଇ କେବେ ସରିବ, କେତେ ଟଙ୍କା ବ୍ୟୟ ହେବ, କେତେ ଲମ୍ବ ଓସାର ହେବ ସେନେଇ କୌଣସି ସୂଚନା ଫଳକ ନାହିଁ। ରାସ୍ତା ମରାମତି ଅଧା ପାନ୍ତରିଆ ହେଇଥିବାରୁ ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି। ଅନେକ ଖାଲ ଢିପ ଡେଇଁ ଏବଂ ଧୂଳି ଧୂସରିତ ହେଇ ବାଇକ୍ ଚାଳକମାନେ ଯାତାୟାତ କରୁଛନ୍ତି।
ଏବେ ସେହି ରାସ୍ତାର ଚଉଡା କରଣ ପାଇଁ ବ୍ୟାପକ ମାତ୍ରା ରେ ଗଛ କଟା ଚାଲିଛି। ତେବେ କେବଳ ଏହି ରାସ୍ତା ନୁହେଁ ଛତିଗୁଡ଼ା ରୁ ନର୍ଲା ରାସ୍ତାରେ ମଧ୍ୟ ବହୁ ପୁରୁଣା ଗଛ କଟା ଯାଇଛି। ଏହି ରାସ୍ତା ଚଉଡା କରିବାକୁ କାମ ଚାଲିଥିବା ରୁ ବହୁ ପୁରୁଣା ଗଛ ସବୁ କାଟି ଦିଆଯାଇଛି। ଗଛ ର ଚେର ପାଖରେ ଗାତ ଖୋଲି ସେଥିରେ ନିଆଁ ଲଗାଇ ଦିଆ ଯାଇଛି। ତେବେ ଗଛ କଟା ପାଇଁ ବନ ବିଭାଗର ଅନୁମତି ନିଆଯାଇଛି କି ନାହିଁ ତାହା ତ ଭିନ୍ନ କଥା। ତେବେ ଏକଦା ରାସ୍ତାର ଶୋଭା ବର୍ଦ୍ଧନ କରି ପଥଚାରୀଙ୍କୁ ଛାଇ ପ୍ରଦାନ କରୁଥିବା ଗଛ ଗୁଡ଼ିକ କଟାଯିବା ପରେ ରାସ୍ତା ଦୁଇଟି ଶ୍ରୀହୀନ ହେଇ ପଡ଼ିଛି। ହେଲେ ଅନ୍ୟ ରାଜ୍ୟ ଭଳି ବଡ ଗଛ ଗୁଡ଼ିକୁ ଚେର ସହିତ ଓପାଡ଼ି ଅନ୍ୟତ୍ର ଲଗାଯିବା ବଦଳରେ କାଟି ଦିଆଯାଉଥିବାରୁ ପଥଚାରୀଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଉଛି। ଯଦି ଏହି ଅଞ୍ଚଳରେ ରାସ୍ତା ସମ୍ପ୍ରସାରଣ ଆଳରେ ବ୍ୟାପକ ଗଛ କଟାକୁ ବନ୍ଦ କରା ନ ଯାଏ ତାହେଲେ ଆଗାମୀ ଦିନରେ ଏହାର ଦୃଢ଼ ପ୍ରତିବାଦ କରାଯିବା ସହିତ ଆନ୍ଦୋଳନ ଜରିଆରେ ରାଜରାସ୍ତାକୁ ଓହ୍ଲାଇବୁ ବୋଲି ସ୍ଥାନୀୟ ଅଞ୍ଚଳବାସୀ ଚେତାବନୀ ଦେଇଛନ୍ତି।
Comments are closed.