ଭୁବନେଶ୍ବର: ବନ୍ୟା ଯନ୍ତ୍ରଣାରେ କଲବଲ ହେଉଛି ଭଦ୍ରକ ଜିଲା। ବୈତରଣୀ ନଦୀରେ ବନ୍ୟା ଜଳ କୋପରେ ଧାମନଗରର ଅଧିକାଂଶ ଅଞ୍ଚଳ ଉବୁଡୁବୁ ହେବା ସହ ଭାସୁଛି । ଜଳବନ୍ଦୀ ଅବସ୍ଥାରେ ହଜାର ହଜାର ଲୋକେ ରହିଛନ୍ତି । ସୁବର୍ଣ୍ଣରେଖା ତାଉରେ ବାଲିଆପାଳ ବୁଡିଛି । ଭୋଗରାଇ ଓ ଜଳେଶ୍ୱର ବ୍ଲକର ଅନେକ ଗାଁରେ ବଢି ପାଣି ଲହଡି ଭାଙ୍ଗୁଛି । ବାରମ୍ବାର ବନ୍ୟା କାରଣରୁ ଲୋକଙ୍କ ଦୁର୍ଦ୍ଦଶା ବଢିବାରେ ଲାଗିଛି । ସେପଟେ ଲଗାଣ ବର୍ଷା ଯୋଗୁଁ ଜୀବନଯାତ୍ରା ପ୍ରଭାବିତ ହୋଇଛି । ତୁକୁମ ଗାଁ ରାସ୍ତା ପୋଲ ଉପରେ ମଧ୍ୟ ଦୁଇ ଫୁଟର ବନ୍ୟା ପାଣି ପ୍ରଭାବିତ ହେଉଛି । ପୋଲ ଉପରେ ବନ୍ୟା ପାଣି ଯୋଗୁ ଯାତାୟାତ ଠପ୍ ହୋଇଯାଇଛି । ସେହିପରି କୋରାପୁଟ ଜିଲା ଲମତାପୁଟରେ ପ୍ରବଳ ବର୍ଷା ହୋଇଛି । ଲଗାଣ ବର୍ଷା ଯୋଗୁଁ ବଢୁଛି ଜଲାପୁଟ ଜଳଭଣ୍ଡାର । ଜଲାପୁଟର ବିପଦ ସଙ୍କେତ ୨୭୫୦ ଘନଫୁଟ, ବର୍ତ୍ତମାନ ରହିଛି ୨୭୪୮ ଘନଫୁଟ୍ । ୨ଟି ଗେଟ୍ ଖୋଲାଥିବା ବେଳେ ଏହା ମଧ୍ୟ ଦେଇ ୫ ହଜାର କ୍ୟୁସେକ ଜଳ ନିଷ୍କାସନ ହେଉଛି ।
ଅନେକ ଲୋକେ ଏବେ ମଧ୍ୟ ପାଣି ଘେରରେ ରହିଛନ୍ତି । ଧାମନଗରରେ ବନ୍ୟା ଜଳରେ ଉବୁଡୁବୁ ହେଉଥିବା ବେଳେ ଚାଷ ଜମି, ଘରଦ୍ୱାର ନଷ୍ଟ ହୋଇଯାଇଛି । ମନୁଷ୍ୟଙ୍କ ସହ ଗୃହପାଳିତ ପଶୁ ମଧ୍ୟ ସମସ୍ୟା ଭିତରେ ରହିଛନ୍ତି । ବୈତରଣୀର ବନ୍ୟାରେ ହସନାବାଦ, ଅର୍ଜୁନପୁର, ପଧାନୀ, ସୋହଡା ଆଦି ୪ଟି ପଞ୍ଚାୟତ ପ୍ରଭାବିତ ହୋଇଛି ।
ସୁନ୍ଦରଗଡରେ ମଧ୍ୟ ପରିସ୍ଥିତି ବେହାଲ୍ ହୋଇପଡିଛି । ସାହଜବାହଲରେ ଏକ ଅଘଟଣ ଘଟିବା ମଧ୍ୟ ସାମ୍ନାକୁ ଆସିଛି । ଏଠାରେ ବନ୍ୟା ପାଣିରେ ଏକ ଟ୍ରେଲର୍ ଭାସି ଯାଇଛି । ଝଣ୍ଟେଲବୁଡ ନାଳରେ କୋଇଲା ବୋଝେଇ ଟ୍ରେଲର ଓଲଟି ପଡି ଭାସି ଜଣେ ଚାଳକ ନିଖୋଜ ହୋଇ ଯାଇଛନ୍ତି । ପୋଲଟି ବିପଦସଙ୍କୁଳ ଅବସ୍ଥାରେ ଥିବା ସହ ଭାରୀଯାନ ଚଳାଚଳ ପାଇଁ ବାରଣ କରାଯାଇଛଥିଲା ।
ବାସ୍ ଗୋଟିଏ ଦିନ ପରେ.. ନବପଞ୍ଚମ ଯୋଗ ଏହି ରାଶିଙ୍କୁ କୋଟିପତି କରିବେ ପ୍ରଭୁ ଗଣେଶ..
